पणजी: अपराजित कामगिरीसह मंदार लाड याने अखिल गोवा राज्य पातळीवरील सीनियर खुल्या राष्ट्रीय निवड चाचणी स्पर्धेत विजेतेपद पटकावले. त्याने नऊ फेऱ्यांतून सर्वाधिक साडेआठ गुणांची कमाई केली. स्पर्धा मडगाव येथे झाली.

स्पर्धेत अव्वल मानांकन असलेल्या मंदारने अखेरच्या फेरीत आयुष शिरोडकर याच्यावर नोंदवून विजेतेपदावर शिक्कामोर्तब केले. त्याने स्पर्धेत एकूण आठ विजय व एका बरोबरीची नोंद केली. ११ वर्षांखालील वयोगटातील आर्यव्रत नाईक देसाई याने स्पर्धेत शानदार खेळ करताना साडेसात गुणांसह उपविजेतेपद मिळविले. काणकोणच्या या खेळाडूने स्पर्धेत अपराजित राहताना सहा विजय व तीन बरोबरीची नोंद केली.

देवेश नाईक व शुभ बोरकर यांचे समान सात गुण झाले. टायब्रेकर गुणांनंतर देवेश तिसऱ्या, तर शुभ चौथ्या स्थानी राहिला. ऋषिकेश परब, गुंजल चोपडेकर, आयुष शिरोडकर, विभव केरकर, अर्विन आल्बुकर्क, एड्रिक वाझ यांनी अनुक्रमे पाचवा ते दहावा क्रमांक मिळविला.