पणजी: चॅरिटी कप फुटबॉल लढतीने शनिवारी (ता. १२) गोवा फुटबॉल असोसिएशनच्या (जीएफए) २०२६-२७ मोसमाचा पडदा उघडणार आहे. राय पंचायत मैदानावर गतवेळच्या प्रोफेशन लीग विजेत्या स्पोर्टिंग क्लब द गोवा संघासमवेत धेंपो स्पोर्टस क्लबचे तगडे आव्हान असेल.

धेंपो क्लबविरुद्धच्या लढतीत स्पोर्टिंग क्लबच्या नवोदित खेळाडूंवर लक्ष असेल, तसेच या संघाचे मुख्य प्रशिक्षक या नात्याने दीपांकर शर्मा यांचाही पहिलाच स्पर्धात्मक सामना असेल. गतवर्षीही स्पोर्टिंग क्लबने चॅरिटी कप लढतीत बाजी मारली होती. गोलशून्य बरोबरीनंतर त्यांनी पेनल्टी शूटआऊटमध्ये धेंपो स्पोर्टस क्लबला ४-२ फरकाने हरविले होते.

स्पोर्टिंग क्लबने नव्या मोसमासाठी आठ नव्या युवा खेळाडूंना करारबद्ध केले आहे. त्यात सां जुझे द आरियल येथील २० वर्षीय मध्यक्षक अ‍ॅश्नॉय गोम्स आणि रायचा २० वर्षीय आघाडीपटू गॅरिसन फर्नांडिस यांचा समावेश आहे. सांगे येथील २४ वर्षीय ऋतिक बांदोडकर आणि केपेचा १९ वर्षीय अ‍ॅलिटन फुर्तादो हे दोघेही आघाडीपटू आहेत.

चिंचोणेचा २१ वर्षीय डेल्मन रिबेलो बचावफळीला बळकटी देईल. वेगवान आघाडीपटू मेव्हन डायस २३ वर्षांचा असून तो विंगर म्हणूनही खेळू शकतो. गोलरक्षक फ्रेव्हिनो फर्नांडिस २२ वर्षांचा आहे. नागोवाचा २३ वर्षीय वेलांको रॉड्रिग्ज हा आक्रमक मध्यरक्षक आणि विंगर म्हणून छाप पाडू शकतो. याशिवाय मागील मोसमातील विजेत्या संघातील आयव्हन कॉस्ता, धीरज चौहान आणि अ‍ॅरॉन बार्रेटो परिचित चेहरेहीमैदानात उतरतील.