Professional League 2024 GENO FC Vs Cortalim Villagers

पणजी: जीनो एफसीने भरपाई वेळेतील गोलमुळे कुठ्ठाळी व्हिलेजर्सवर ३-२ असा निसटता विजय नोंदवून गोवा प्रोफेशनल लीग फुटबॉल स्पर्धेत अग्रस्थान मिळविले. आणखी एका सामन्यात पॅक्स ऑफ नागोवा संघाने कळंगुट असोसिएशनला २-० फरकाने नमविले.

म्हापसा येथील धुळेर स्टेडियमवर जीनो एफसीने पिछाडीवरून मुसंडी मारली. ९०+१ व्या मिनिटास मेईनाम मुशरफ याने केलेल्या गोलमुळे जीनो क्लबने सात लढतीतील पाचवा विजय नोंदविला. त्यांचे आता सर्वाधिक १६ गुण झाले आहेत. त्यापूर्वी पूर्वार्धात पिछाडीवर पडल्यानंतर त्यांच्यासाठी नायजेल फर्नांडिस याने ४७व्या, तर सिडनी गांवकार याने ५९व्या मिनिटास गोल करून २-१ अशी आघाडी मिळवून दिली होती.

हे दोन्ही गोल पेनल्टी फटक्यांवर झाले. कुठ्ठाळी व्हिलेजर्ससाठी चौथ्या मिनिटास रॉनिल आझावेदो याने आघाडीचा गोल केला, नंतर ८४व्या मिनिटास व्हेलरॉय कार्व्हालो याने २-२ अशी बरोबरी साधून दिली होती. कुठ्ठाळी व्हिलेजर्सचा हा तिसरा पराभव असून सहा लढतीनंतर त्यांचे पाच गुण कायम राहिले.

नागोवा पंचायत मैदानावर पॅक्स ऑफ नागोवाने सात लढतीतील तिसरा विजय नोंदविला. त्यांच्यासाठी शेर्विन अब्रांचिस याने ४७व्या, तर शुबर्ट परेरा याने ८६व्या मिनिटास प्रत्येकी एक गोल केला. नागोवा संघाचे आता नऊ गुण झाले आहेत. कळंगुट असोसिएशनला चौथा पराभव पत्करावा लागला. त्यामुळे सहा लढतीतून त्यांचे चार गुण कायम राहिले.