India Bangladesh Cricket Tension 2026: भारत आणि बांगलादेश यांच्यातील राजकीय संबंधांमध्ये निर्माण झालेली कटुता आता केवळ सीमेपुरती मर्यादित न राहता तिचे पडसाद क्रीडा मैदानावरही उमटू लागले आहेत. आयपीएलमध्ये कोलकाता नाईट रायडर्सने बांगलादेशचा स्टार वेगवान गोलंदाज मुस्तफिजुर रहमान याला आपल्या संघातून रिलीज केल्यानंतर क्रीडा विश्वात खळबळ उडाली. या घटनेने संतप्त झालेल्या बांगलादेश क्रिकेट बोर्डाने थेट आंतरराष्ट्रीय क्रिकेट परिषदेला पत्र लिहून एक आक्रमक मागणी केली.

आगामी टी-20 वर्ल्ड कपमधील बांगलादेशचे (Bangaldesh) जे सामने भारतात नियोजित आहेत, ते भारताबाहेर हलवण्यात यावे, अशी विनंती बांगलादेशने केली. या वादामुळे दोन्ही देशांतील क्रिकेट संबंध कमालीचे ताणले गेले असतानाच आता या वादाची छाया गोल्फ या खेळावरही पडताना दिसत आहे.

प्रोफेशनल गोल्फ टूर ऑफ इंडियाच्या (PGTI) महत्त्वाकांक्षी ‘72 द लीग’ या नव्या स्पर्धेच्या उद्घाटन प्रसंगी भारतीय क्रिकेटचे महानायक कपिल देव यांनी उपस्थिती लावली. या कार्यक्रमात त्यांना भारत-बांगलादेश यांच्यातील बिघडलेल्या संबंधांचा परिणाम गोल्फवर होईल का, असा थेट प्रश्न विचारण्यात आला. विशेषतः भारतातील व्यावसायिक गोल्फ स्पर्धांमधून बांगलादेशी खेळाडूंना बाहेर काढले जाणार का, या चर्चेने सध्या जोर धरला आहे.

त्यावर उत्तर देताना कपिल देव यांनी अत्यंत सावध पवित्रा घेतला. त्यांनी सांगितले की, बांगलादेशी खेळाडूंच्या सहभागाबाबत अद्याप कोणताही अंतिम निर्णय घेण्यात आलेला नाही. या संवेदनशील विषयावर येणाऱ्या काळात संघटनेत सविस्तर चर्चा केली जाईल आणि त्यानंतरच पुढील दिशा ठरवली जाईल. सध्या जमाल हुसेन, मोहम्मद सिद्दीकुर रहमान आणि मोहम्मद अकबर हुसेन यांसारखे बांगलादेशचे नामवंत गोल्फर भारतीय सर्किटवर खेळत आहेत, त्यामुळे हा निर्णय क्रीडा आणि राजकीय दृष्टीने महत्त्वाचा ठरणार आहे.

कपिल देव यांनी बांगलादेश क्रिकेट बोर्डाने आयसीसीला लिहिलेल्या पत्रावर भाष्य करण्यास स्पष्ट नकार दिला असला, तरी त्यांचे पूर्ण लक्ष आता गोल्फमध्ये क्रांती घडवून आणण्यावर आहे. त्यांनी क्रिकेट आणि गोल्फमधील फरकाचा उल्लेख करत गोल्फला अधिक लोकप्रिय करण्यासाठी आपले व्हिजन मांडले.

कपिल देव म्हणाले की, क्रिकेट हा मुळात एक सांघिक खेळ आहे, तर गोल्फ हा वैयक्तिक कौशल्यावर आधारित खेळ मानला जातो. मात्र, भारतासारख्या देशात गोल्फचा मोठ्या प्रमाणावर विस्तार करायचा असेल, तर त्याला सांघिक स्वरुप देणे आवश्यक आहे. ज्याप्रमाणे आयपीएलच्या आगमनानंतर जागतिक क्रिकेटमध्ये आमूलाग्र बदल झाले, अगदी तसाच बदल आपल्याला गोल्फमध्येही हवा आहे. या नव्या लीगच्या माध्यमातून खेळाडू वैयक्तिक कामगिरीसोबतच आपल्या शहराच्या आणि संघाच्या ओळखीसाठी लढतील, ज्यामुळे प्रेक्षकांचा रस वाढेल.

‘72 द लीग’ या नव्या उपक्रमाबद्दल अधिक माहिती देताना सांगण्यात आले की, ही पूर्णपणे फ्रेंचाइजी आधारित स्पर्धा असेल. यामध्ये विविध शहरांचे प्रतिनिधित्व करणारे संघ एकमेकांशी भिडतील. प्रत्येक संघात 10 व्यावसायिक गोल्फ खेळाडूंचा समावेश असेल आणि या खेळाडूंची निवड 31 जानेवारी 2026 रोजी होणाऱ्या भव्य लिलावातून (Auction) केली जाईल.

या लीगचा पहिला हंगाम 21 फेब्रुवारी 2026 रोजी सुरु होऊन 6 मार्च 2026 पर्यंत चालेल. या ऐतिहासिक स्पर्धेसाठी दिल्ली-एनसीआरमधील तीन अत्यंत प्रतिष्ठित गोल्फ मैदानांची निवड करण्यात आली आहे, ज्यामध्ये क्लासिक गोल्फ अँड कंट्री क्लब, जेपी ग्रीन्स गोल्फ कोर्स आणि कुतुब गोल्फ कोर्सचा समावेश आहे. या लीगमुळे भारतीय गोल्फला जागतिक स्तरावर नवीन ओळख मिळेल, अशी आशा व्यक्त केली जात आहे. मात्र, राजकीय तणावाच्या पार्श्वभूमीवर बांगलादेशी खेळाडूंच्या लिलावातील सहभागाकडे संपूर्ण क्रीडा विश्वाचे डोळे लागले आहेत.