I League Football Churchill Brothers Vs Namdhari FC

पणजी: आय-लीग फुटबॉल स्पर्धेत सध्या अव्वल स्थानी असलेल्या गोव्याच्या चर्चिल ब्रदर्स संघाची लढत बुधवारी (ता. ८) नामधारी एफसीविरुद्ध होईल. सामना सासष्टीतील राय पंचायत मैदानावर खेळला जाईल.

दिमित्रिस दिमित्रिओ यांच्या मार्गदर्शनाखालील चर्चिल ब्रदर्सने स्पर्धेत सहापैकी चार सामने जिंकले असून राय मैदानावरच मागील लढतीत धेंपो स्पोर्टस क्लबला दोन गोलने हरविले होते. नामधारी एफसीचे सहा सामन्यांतून आठ गुण झाले असून ते पाचव्या क्रमांकावर आहेत. मागील लढतीत त्यांनी स्पोर्टिंग क्लब बंगळूरला गोलशून्य बरोबरीत रोखले होते.

चर्चिल ब्रदर्स संघाने संघातील दोन परदेशी खेळाडू कर्टिस ग्युथरी व हुआन मेरा यांना मुक्त केले असून आयव्हरी कोस्टचा ग्नोहेरे क्रिझो याला करारबद्ध केले आहे. आय-लीग स्पर्धेत चर्चिल ब्रदर्सने ओळीने चार सामने जिंकले असून त्यांचा दक्षिण आफ्रिकन आघाडीपटू वेड लेके याने पाच गोल नोंदविले आहेत.