पणजी: धावपर्वत उभारण्याच्या हेतूने गोव्याने नाणेफेक जिंकून प्रथम फलंदाजी स्वीकारली, पण नागालँडच्या गोलंदाजांनी लगाम खेचल्यामुळे रणजी करंडक प्लेट विभागीय क्रिकेट स्पर्धेच्या अंतिम लढती पहिल्या दिवसअखेर ७ बाद २५८ अशी स्थिती झाली.
गोव्यातर्फे सुयश प्रभुदेसाई (५६), स्नेहल कवठणकर (६३) व कश्यप बखले (नाबाद ६८) यांनी अर्धशतके ठोकली. नागालँडमधील सोविमा येथे गुरुवारपासून पाच दिवसीय अंतिम लढतीस सुरवात झाली. दिवसाच्या अखेरच्या सत्रात जम बसलेल्या स्नेहल याच्यासह गोव्याने चार फलंदाज ४८ धावांत गमावले, त्यामुळे पहिल्या डावात मोठी धावसंख्या उभारून नागालँडवर दबाव टाकण्याची योजना फोल ठरली.
नाणफेक जिंकून प्रथम फलंदाजी स्वीकारल्यानंतर गोव्याला सुयश व रोहन कदम (२९) यांनी गोव्याला ५७ धावांची दमदार सलामी दिली. रोहन व के. व्ही. सिद्धार्थ (१) तीन धावांच्या अंतराने बाद झाल्यामुळे गोव्याची २ बाद ६० अशी स्थिती झाली.
उपाहाराला गोव्याने २ बाद १०० धावा केल्या होत्या. सुयशने स्नेहलसमवेत तिसऱ्या विकेटसाठी ६६ धावांची भागीदारी केली. अर्धशतकानंतर लगेच सुयशला फिरकी गोलंदाज इमलीवटी लेमतूर याने पायचीत बाद केले.
अरुणाचल प्रदेशविरुद्ध अखेरच्या साखळी सामन्यात नाबाद ६०६ धावांची भागीदारी केलेले त्रिशतकवीर स्नेहल व कश्यप बखले यांनी गोव्याचा डाव सावरण्याचा प्रयत्न केला, मात्र स्नेहलला सुचित याने स्वतःच्याच गोलंदाजीव झेलबाद केल्याने चौथ्या विकेटची ६१ धावांची भागीदारी भंगली. त्यानंतर दर्शन मिसाळ (५), समर दुभाषी (१३), मोहित रेडकर (२) यांनी नागालँडच्या फिरकी माऱ्यासमोर नांगी टाकल्यामुळे गोव्याची घसरगुंडी उडाली. अमूल्य पांड्रेकरने (८) कश्यपला साथ देत दिवसअखेर गोव्याचे आणखी नुकसान होऊ दिले नाही.
महान फलंदाज सचिन तेंडुलकर याचा मुलगा अर्जुन तेंडुलकर सलग तिसरा मोसम गोव्यातर्फे ‘पाहुणा’ क्रिकेटपटू या नात्याने खेळत आहे. यंदा त्याच्या दुखापतींचे सत्र गोव्यासाठी डोकेदुखी ठरत आहे. तंदुरुस्तीअभावी तो नागालँडविरुद्धची अंतिम लढत खेळू शकला नाही. याच कारणास्तव २५ वर्षीय डावखुरा अष्टपैलू गेल्या वर्षी ऑक्टोबरमध्ये प्लेट विभागीय पहिल्या लढतीत मणिपूरविरुद्ध खेळू शकला नव्हता. सय्यद मुश्ताक अली करंडक टी-२० क्रिकेट स्पर्धेत तीन सामन्यांना मुकला होता, तर विजय हजारे करंडक एकदिवसीय स्पर्धेत अखेरचे चार सामन संघात नव्हता.
गोवा, पहिला डाव ः ९० षटकांत ७ बाद २५८ (रोहन कदम २९, सुयश प्रभुदेसाई ५६, के. व्ही. सिद्धार्थ १, स्नेहल कवठणकर ६३, कश्यप बखले नाबाद ६८, दर्शन मिसाळ ५, समर दुभाषी १३, मोहित रेडकर २, अमूल्य पांड्रेकर नाबाद ८, दीप बोरा १-४८, जे. सुचित ३-६४, इमलीवटी लेमतूर १-३२, राँगसेन जोनाथन १-६१).
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.