पणजी: गोव्याच्या १९ वर्षांखालील मुलांच्या क्रिकेट संघाने कुचबिहार करंडक क्रिकेट स्पर्धेत सलग दुसऱ्या सामन्यात डावाने विजय मिळवून बोनस गुणाची कमाई केली. त्यांनी मंगळवारी आसामला डाव व २१५ धावांच्या फरकाने सहजपणे नमविले.

पणजी जिमखान्याच्या भाऊसाहेब बांदोडकर मैदानावर झालेला एलिट ड गट सामना तिसऱ्या दिवशी चहापानापूर्वीच संपला. गोव्याने (Goa) पहिल्या डावात ३७६ धावा केल्यानंतर कालच्या ४ बाद ४८ वरुन आसामचा पहिला डाव मंगळवारी सकाळी ८६ धावांत संपुष्टात आला. गोव्याने २९० धावांची आघाडी प्राप्त केली व त्यांनी आसामवर फॉलोऑन लादला. नंतर पाहुण्याचा संघाचा दुसरा डाव ७५ धावांतच गुंडाळला गेला.

गोव्याच्या सर्वच गोलंदाजांनी शानदार मारा केला, त्याच फिरकी गोलंदाज गोलंदाज मिहीर कुडाळकर जास्त उल्लेखनीय ठरला. त्याने दोन्ही डावांत मिळून फक्त नऊ धावांत सात गडी (३-० व ४-९) बाद केले. आसामने दोन्ही डावांत मिळून फक्त ७६.२ षटकेच फलंदाजी केली. त्यांना गोव्याच्या गोलंदाजांचा चिवटपणे सामना करणे शक्य झाले नाही.

गोव्याला या लढतीतून बोनससह एकूण सात गुण मिळाले. त्यांचे आता दोन सामन्यांतून १४ गुण झाले आहेत. अगोदरच्या सामन्यात त्यांनी छत्तीसगडला डाव व १३ धावांनी नमविले होते. आसामला सलग दुसऱ्या लढतीत डावाच्या फरकाने पराभूत व्हावे लागले. पूर्वीच्या सामन्यात त्यांना बंगालने डाव व १७२ धावांनी हरविले होते. लागोपाठ दोन सामने जिंकलेल्या गोव्याचा गटातील तिसरा सामना १ ते ४ डिसेंबर या कालावधीत सांगे येथे उत्तर प्रदेशविरुद्ध खेळला जाईल.

संक्षिप्त धावफलक

गोवा, पहिला डाव : ३७६

आसाम, पहिला डाव (४ बाद ४८ वरुन) : ४१.२ षटकांत सर्वबाद ८६ (दीपंकर पॉल १५, समर्थ राणे १२-३-३३-३, चिगुरुपती व्यंकट १२-५-२१-२, यश कसवणकर १४-७-२१-२, मिहीर कुडाळकर ३.२-३-०-३).

आसाम (Assam) दुसरा डाव (फॉलोऑन) : ३५ षटकांत सर्वबाद ७५ (वरुणज्योती मालाकार १७, दीपंकर पॉल नाबाद २०, चिगुरुपती व्यंकट ४-१-८-०, यश कसवणकर ९-१-१९-२, समर्थ राणे ६-१-१६-१, मिहीर कुडाळकर ६-०-९-४, शिवेन बोरकर १०-५-१८-२).