पणजी: राज्यातील उपलब्ध सरकारी क्रीडा सुविधांचा वापर आता खासगी क्रीडा संस्था आणि संघटनांना करता येईल, तसा धोरणात्मक निर्णय मुख्यमंत्री डॉ. प्रमोद सावंत यांनी शुक्रवारी अर्थसंकल्पीय भाषणातून विधानसभेत जाहीर केला.

मुख्यमंत्री म्हणाले, की ‘‘क्रीडा व युवा व्यवहार खात्यासाठी २५१ कोटी रुपयांची तरतूद केली आहे. त्यातील १७६ कोटी रुपये महसुली खर्चासाठी, तर ७५ कोटी रुपये भांडवली खर्चासाठी आरक्षित आहेत.

राज्यातील क्रीडा संस्कृतीची प्रगती सुनिश्चित करण्यासाठी तसेच इनडोअर स्टेडियम, मैदाने यांचा योग्य वापर होण्यासाठी स्थानिक क्लबांना आणि क्रीडा संघटनांना त्यांच्या क्षेत्रातील क्रीडा सुविधांचा वापर करण्यास परवानगी दिली जाणार आहे.’’

मडकई येथे क्रीडा संकुल, सां जुझे द आरियल येथे फुटबॉल मैदान, कुडतरी येथे व्हिलेज स्कूल मैदान, फातोर्डा येथे जॉगींग ट्रॅक, वड्डे-सांगे येथे शाळेचे क्रीडांगण, कुडका येथे मैदान आणि कुंभारजुवे येथे शालेय क्रीडांगण बांधण्याचे काम या वर्षी पूर्ण होईल. यासाठी ३३.७७ कोटी रुपये खर्च येणार आहे. विविध मैदानांच्या विकासाची कामे राज्यभरात ६१.३१ कोटी रुपये खर्चून यंदा सुरु केली जाणार आहेत, असे मुख्यमंत्री डॉ. सावंत यांनी सांगितले.

क्रीडापटूंसाठी ‘एकलव्य’ प्रोत्साहन योजना

नामवंत अशा क्रीडा अकादमी आणि केंद्रांत प्रशिक्षण घेणाऱ्या राज्यातील आदिवासी प्रतिभावंत क्रीडापटूंना आर्थिक मदत करण्यात येणार आहे. यासाठी ‘एकलव्य’ क्रीडापटू प्रोत्साहन योजना नावाची नवी योजना सुरु केली जाणार आहे. यंदा त्यासाठी ५० लाख रुपयांची तरतूद केल्याचे मुख्यमंत्री डॉ. सावंत यांनी अर्थसंकल्पीय भाषणात सांगितले.