पणजी: गोव्याच्या मुलींनी ३०व्या राष्ट्रीय सबज्युनियर टेनिस बॉल क्रिकेट स्पर्धेत विजेतेपद मिळविले. अंतिम लढतीत त्यांनी उत्तर प्रदेशला चार धावांनी पराभूत केले. मुलांच्या गटात गोव्याला संयुक्त तिसरा क्रमांक मिळाला. स्पर्धा राजस्थानमधील दौसा येथे झाली.

मुलींच्या अंतिम लढतीत गोव्याने प्रथम फलंदाजी करताना ६ षटकांत ४ बाद ३८ धावा केल्या. पूर्वा गावडे हिने १७, तर आयुषी श्रीवास्तव हिने १० धावा नोंदविल्या. उत्तरादाखल उत्तर प्रदेशला ६ षटकांत ४ बाद ३४ धावा करता आल्या.

गोव्यातर्फे पूर्वा गावडे (२-५) व तनिशा वेळीप (२-७) यांची गोलंदाजी प्रभावी ठरली. मुलांच्या उपांत्य लढतीत उत्तर प्रदेशने गोव्याला १४ धावांनी हरविले. उत्तर प्रदेशने ६ षटकांत २ बाद ५९ धावा केल्यानंतर गोव्याला ५ बाद ४५ धावाच करता आल्या.

गोव्यातील टेनिस बॉल क्रिकेट खेळाच्या विकासात मोलाचे योगदान दिलेले दिवंगत मंत्री रवी नाईक यांना जिंकलेले करंडक समर्पित करत असल्याचे गोवा टेनिस बॉल क्रिकेट असोसिएशनने जाहीर केले.