पणजी: गोवा पोलिस संघाने जीएफए प्रोफेशनल लीग फुटबॉल स्पर्धेत विजयी हॅटट्रिक साधताना गुरुवारी कळंगुट असोसिएशनला २-१ फरकाने नमविले. सामना म्हापसा येथील धुळेर स्टेडियमवर झाला.

सामन्याच्या ८१व्या मिनिटास बदली खेळाडू सॅम्युएल डिसोझा याने नोंदविलेल्या गोलमुळे गोवा पोलिस संघाला स्पर्धेत सलग तिसरा सामना जिंकता आला. त्यापूर्वी त्यांना रोनाल्डो ऑलिव्हेरा याने २२व्या मिनिटास आघाडी मिळवून दिली होती. या गोलमुळे पोलिस संघ विश्रांतीला आघाडीवर होता.

५०व्या मिनिटास टुफेल हिंगोरा याने कळंगुट असोसिएशनसाठी बरोबरीचा गोल केला होता. सामन्यातील अखेरची नऊ मिनिटे बाकी असताना सॅम्युएलचा गोल पोलिस संघासाठी निर्णायक ठरला. लागोपाठ तीन सामने जिंकल्यामुळे गोवा पोलिस संघाचे आता नऊ गुण झाले आहेत. कळंगुट असोसिएशनला दुसरा पराभव पत्करावा लागला. त्यामुळे तीन लढतीनंतर त्यांचे तीन गुण कायम राहिले आहेत. शुक्रवारी (ता. ११) स्पर्धेत धुळेर स्टेडियमवर एफसी गोवा आणि गार्डियन एंजल स्पोर्टस क्लब यांच्यात लढत होईल.