FC Goa vs punjab FC Iker Guarrotxena Misses Isl Match

पणजी: प्रमुख स्पॅनिश आघाडीपटू इकेर ग्वॉर्रोचेना याच्या अनुपस्थितीत एफसी गोवा संघ इंडियन सुपर लीग (आयएसएल) फुटबॉल स्पर्धेत दिल्ली येथे पंजाब एफसीविरुद्ध खेळेल. ३२ वर्षीय अनुभवी खेळाडूस आरोग्याच्या कारणास्तव सक्तीची विश्रांती घ्यावी लागली आहे.

एफसी गोवा (FC Goa) व पंजाब एफसी यांच्यातील सामना गुरुवारी (ता. २७) दिल्ली येथे खेळला जाईल. सामना विषयक पत्रकार परिषदेत मंगळवारी एफसी गोवाचे मुख्य प्रशिक्षक मानोलो मार्केझ यांनी सांगितले, की ``इकेर संघासोबत दिल्लीचा प्रवास करणार नाही. आपली प्रकृती चांगली असल्याचे त्याला वाटत असले, तरी धोका न पत्करता आम्हाला योग्य निर्णय घ्यावा लागत आहे. आरोग्य जास्त मौल्यवान आहे.``

एफसी गोवाने मागील लढतीत फातोर्डा येथे केरळा ब्लास्टर्सला २-० असे पराभूत केले होते. तेव्हा ग्वॉर्रोचेना याने पहिला गोल केला व नंतर त्याच्या असिस्टवर महंदम यासीर याने संघाची आघाडी वाढविली होती. सामन्याच्या भरपाई वेळेत सहकारी खेळाडू संदेश झिंगन याच्याशी झालेल्या धडकेत ग्वॉर्रोचेना याच्या डोक्याला मार लागला होता, त्यावेळी त्याला भोवळ आली होती.

विजयी मालिका राखण्याचे ध्येय

मोहन बागानने ५२ गुणांसह आयएसएल स्पर्धेत लीग शिल्डचा मान सलग दुसऱ्या मोसमात पटकावला आहे. एफसी गोवाचे २१ सामन्यांतून ४२ गुण असून ते दुसऱ्या क्रमांकावर आहेत. याच जागी साखळी फेरीतील मोहीम संपविण्याचे ध्येय असल्याचा पुनरुच्चार मार्केझ यांनी मंगळवारी केला. ते म्हणाले, की ``आमचे आता दुसरा क्रमांक राखण्याचे उद्दिष्ट आहे. आमच्यासाठी असेच पुढे जाणे आवश्यक आहे. दिल्लीत (Delhi) (पंजाब एफसीविरुद्ध) पूर्ण तीन गुणांवर लक्ष केंद्रित केले आहे. आम्हाला पुढील लढतीत जिंकावेच लागेल.``

बंगळूर एफसी प्ले-ऑफ फेरीत

बंगळूर एफसीने मंगळवारी घरच्या मैदानावर चेन्नईयीन एफसीला १-० फरकाने पराभूत करून आयएसएल स्पर्धेची प्ले-ऑफ फेरी गाठली. स्पर्धेत आतापर्यंत मोहन बागान (५२ गुण), एफसी गोवा (४२ गुण), बंगळूर एफसी व जमशेदपूर एफसी (प्रत्येकी ३७ गुण) या संघांनी प्ले-ऑफ फेरी निश्चित केली असून बाकी दोन जागांसाठी चुरस आहे.