पणजी: इंडियन सुपर लीग (आयएसएल) फुटबॉल स्पर्धेत सध्या एफसी गोवा सात, तर ओडिशा एफसी सहा सामने अपराजित आहे. शनिवारी (ता. ४) भुवनेश्वर येथील कलिंगा स्टेडियमवर त्यांच्यात लढत होत असून पराभव टाळण्यासाठीच दोन्ही संघांत चढाओढ असेल.

मानोलो मार्केझ यांच्या मार्गदर्शनाखालील एफसी गोवा संघाने अखेरच्या लढतीत २० डिसेंबर रोजी मोहन बागानला २-१ फरकाने नमविले होते. १९ ऑक्टोबर रोजी मुंबई सिटीविरुद्ध पराभूत झाल्यानंतर त्यांनी स्पर्धेत हार पत्करलेली नाही. दुसरीकडे सर्जिओ लोबेरा यांच्या मार्गदर्शनाखालील ओडिशा एफसीने मागील सहा सामन्यांत पराभव पत्करलेला नाही.

एफसी गोवाने (FC Goa) १२ सामन्यांतून सहा विजय, चार बरोबरी व दोन पराभवांसह २२ गुण प्राप्त केले आहेत. आणखी एक विजय नोंदविल्यास त्यांची गुणतक्त्यातील प्रगती निश्चित आहे. ओडिशा एफसीला मागील लढतीत तळाच्या मोहम्मेडन स्पोर्टिंगने गोलशून्य बरोबरीत रोखले होते. त्यांच्या खाती २० गुण आहेत. त्यांनी १३ लढतीत पाच विजय, पाच बरोबरी व तीन पराभव अशी कामगिरी साधलेली आहे.

विजयासाठीच प्रयत्न ः मार्केझ

भुवनेश्वरला रवाना होण्यापूर्वी मानोलो मार्केझ यांनी पत्रकार परिषदेत सांगितले, की ``दोन्ही संघ सध्या अपराजित आहेत. बरोबरी झाल्यास ही मालिका पुढे सरकेल. विजयासाठीच प्रयत्न असतील, पण हा निकाल सोपा नसेल. सामन्यात काहीही होऊ शकते. ओडिशा घरच्या मैदानावर ताकदवान ठरतो. त्याचवेळी आमच्या संघापाशीही गुणांसाठी आव्हान देण्याची पूर्ण क्षमता आहे.``

मैदानात उतरण्यापूर्वी...

एफसी गोवा सलग ७ लढतीत अपराजित, ५ विजय व २ बरोबरी

ओडिशा एफसीचे मागील ६ लढतीत ३ विजय व ३ बरोबरी

२०२४-२५ मोसमातील अवे मैदानावरील ६ सामन्यांत एफसी गोवाचे ३ विजय व ३ बरोबरी

२०२३-२४ मोसमात फातोर्डा येथे एफसी गोवाची ओडिशावर ३-२ फरकाने मात, भुवनेश्वर येथे १-१ गोलबरोबरी