पणजी: होर्गे ओर्तिझ आणि चिकी याने नोंदविलेल्या गोलच्या बळावर एफसी गोवाने मंगळवारी एएफसी चँपियन्स लीग फुटबॉल स्पर्धेत पूर्ण तीन गुणांची कमाई केली. कुवेतमधील महंमद अल-हमाद स्टेडियमवर झालेल्या क गटातील सामन्यात एफसी गोवाने बांगलादेशच्या फॉर्टिस एफसीवर २-१ फरकाने निसटती मात केली.

अगोदरच्या लढतीत तुर्कमेनिस्तानविरुद्ध ८५व्या मिनिटापर्यंत आघाडीवर राहूनही एफसी गोवाला १-२ असा पराभव पत्करावा लागला होता. मंगळवारी विजय नोंदवून गौरमांगी सिंग यांच्या मार्गदर्शनाखालील संघाने गुणखाते उघडले, तर फॉर्टिंस संघाला सलग दुसरा पराभव पत्करावा लागला. एफसी गोवाचा साखळी फेरीतील अखेरचा सामना शुक्रवारी (ता. २३) कुवेतच्या अल-कादसिया संघाविरुद्ध होईल.

सामन्याच्या सहाव्याच मिनिटास ओर्तिझ याच्या भेदक हेडिंगमुळे एफसी गोवाला आघाडी मिळाली. त्याने हा गोल उदांता सिंगच्या क्रॉसपासवर नोंदविला. ७८व्या मिनिटास राफायेल तुडु याने फॉर्टिस एफसीला १-१ अशी बरोबरी साधून दिली. सामना संपण्यास पाच मिनिटे बाकी असताना ८५व्या मिनिटास बदली खेळाडू फ्रान्चू याच्या असिस्टवर ख्रिस्तियन (चिकी) बोरेगो याचा नेम अचूक ठरला. चिकी याचा हा स्पर्धेतील दुसरा गोल ठरला. भरपाई वेळेतील सातव्या मिनिटास फॉर्टिस एफसीच्या इस्सा जालोव याला सामन्यातील दुसऱ्या यलो कार्डमुळे रेड कार्डसह मैदान सोडावे लागले.