पणजी: आय लीग फुटबॉल स्पर्धेतील बहुचर्चित गोवन डर्बी बुधवारी (ता.१८) सासष्टीतील राया मैदानावर रंगणार आहे. सध्या प्रत्येकी दहा गुणांसह अनुक्रमे पहिल्या व दुसऱ्या स्थानी असलेल्या चर्चिल ब्रदर्स व धेंपो स्पोर्ट्‌स क्लब यांच्यातील लढत चुरसपूर्ण होण्याचे संकेत आहेत. आय लीग फुटबॉल स्पर्धेत धेंपो क्लबने यंदा तब्बल दशकभराने पुनरागमन केले आहे.

गोव्यातील (Goa) या दोन मातब्बर संघातील आय लीगमधील अखेरची लढत २८ मार्च २०१४ रोजी झाली होती, तेव्हा धेंपो क्लबने ४-१ असा दणदणीत विजय प्राप्त केला होता. दोन्ही संघांतील एकूण आय लीग लढतींचा इतिहास पाहता, २२ लढतीत धेंपो क्लबने १३ विजय नोंदविले आहेत. सात लढतीत बरोबरीत राहिल्या असून दोनमध्ये चर्चिल ब्रदर्सने बाजी मारली. सध्याच्या फॉर्मनुसार, बुधवारी चर्चिल ब्रदर्सचे पारडे किंचित वरचढ राहील.

दोन्ही संघांनी प्रत्येकी पाच लढतीतून तीन विजय, एक बरोबरी व एक पराभव अशी समान कामगिरी नोंदविली आहे. गोलफरकात चर्चिल ब्रदर्स (Churchill Brothers) सरस आहे. त्यांनी दहा गोल केले असून धेंपो क्लबने पाच गोल नोंदविले आहे. चर्चिल ब्रदर्सचा दक्षिण आफ्रिकन आघाडीपटू वेड लेके चांगला खेळत असून त्याने पाच लढतीत चार गोल झळकावले आहेत. धेंपो क्लबचा सर्बियन मातिया बाबोविच याने दोन गोल केले आहेत. मागील चर्चिल ब्रदर्सने इंटर काशी संघावर ३-१ असा, तर धेंपो क्लबने श्रीनिदी डेक्कनला १-० संघाने पराभूत केले. यंदा आय-लीग स्पर्धेत गोव्याचा होणारा हा पहिलाच सामना आहे.

सध्याची कामगिरी सुखावणारी: समीर

धेंपो स्पोर्ट्‌स क्लबचे मुख्य प्रशिक्षक समीर नाईक यांनी सांगितले, की ‘कोणत्याही प्रशिक्षकासाठी सध्याचे निकाल आणि दहा गुणांची कमाई सुखावणारीच असेल. एकंदरीत कामगिरीत आम्हाला अजूनही सुधारणेस वाव असून आम्ही आणखी सरस खेळ निश्चितच करू शकतो. आमचा संघ आता स्थिरावत आहे. संघात उशिरा दाखल झालेले आणि अगोदरचे खेळाडू यांच्यात समन्वय साधला आहे. साहजिकच आम्ही उत्साहित आहोत.’ दुखापतीमुळे दोघा खेळाडूंना धेंपो संघ मुकणार असला, तरी त्यांची जागा घेणारे खेळाडू संघात असल्याचा विश्वास समीर यांनी व्यक्त केला.