पणजी: गोव्याची इंटरनॅशनल मास्टर (आयएम) भक्ती कुलकर्णी हिने चेक प्रजासत्ताक येथे झालेल्या ओलोमौक समर इंटरनॅशनल चेस फेस्टिव्हल स्पर्धेत विजेतेपद पटकावले.

अर्जुन पुरस्कार विजेत्या भक्तीने चेक प्रजासत्ताकातील स्पर्धेत शानदार खेळ केला. या स्पर्धेच्या खुल्या क गटात भक्तीने नऊ फेऱ्यांत सर्वाधिक सात गुणांची नोंद करताना सहा विजय व दोन बरोबरींची नोंद केली.

लिथुआनियाचा कँडिडेट मास्टर डॅनिएल सेर याला उपविजेतेपद, तर फ्रान्सता एर्वन लेव्हर याला तिसरा क्रमांक प्राप्त झाला. त्यांचे प्रत्येकी साडेसहा गुण झाले होते. या स्पर्धेत विविध देशांतील ८२ खेळाडूंचा सहभाग होता.

भक्तीचे वडील प्रदीप कुलकर्णी यांनी आनंद व्यक्त करताना सांगितले, की भक्तीची कामगिरी कुटुंबीयासह गोवाच्या राज्यासाठी अभिमानास्पद आहे. गोवा बुद्धिबळ संघटनेने भक्तीचे अभिनंदन केले आहे.