पणजी: रणजी करंडक क्रिकेट स्पर्धेत गोव्यातर्फे चार मोसम खेळलेला माजी कसोटीपटू अजय रात्रा यांनी आता भारतीय क्रिकेटमध्ये नवी जबाबदारी स्वीकारली आहे. क्रिकेटपटू, प्रशिक्षक या नात्याने भरीव योगदान दिल्यानंतर भारतीय क्रिकेट नियामक मंडळाच्या (बीसीसीआय) क्रिकेट सल्लागार समितीने त्यांची पुरुष निवड समिती सदस्यपदी नियुक्ती केली.

मूळ हरियानातील असलेले ४२ वर्षीय अजय रात्रा गोव्यातर्फे देशांतर्गत क्रिकेटमध्ये २००७-०८ ते २०१०-११ या कालावधीत खेळले. गोव्याकडून २० रणजी सामन्यांत त्यांनी ४८.६७ च्या सरासरीने १३६३ धावा करताना चार शतके व पाच अर्धशतकांची नोंद केली. यष्टिंमागे बळीचे अर्धशतक साकारताना ५० झेल व ६ यष्टिचीत अशी कामगिरी केली. निवृत्तीनंतर त्यांनी काही काळ गोव्याच्या १९ वर्षांखालील क्रिकेट संघाचे प्रशिक्षकपदही सांभाळले.

आंतरराष्ट्रीय पातळीवर अजय रात्रा भारताकडून सहा कसोटी व १२ एकदिवसीय सामने खेळले. प्रथम श्रेणी क्रिकेटमध्ये ९९ सामन्यांत ४०२९ धावा व यष्टिंमागे २६० बळी टिपले आहेत. मुख्य प्रशिक्षक या नात्याने त्यांनी आसाम, पंजाब, उत्तर प्रदेश संघालाही मार्गदर्शन केले. राष्ट्रीय क्रिकेट अकादमीत (एनसीए) कार्यरत असताना रात्रा २०२३ साली दक्षिण आफ्रिकेविरुद्धच्या एकदिवसीय मालिकेत भारताच्या प्रशिक्षण चमूत होते. क्लब पातळीवर त्यांनी ओएनजीसी संघाचे प्रतिनिधित्व केले. राष्ट्रीय निवड समितीत रात्रा यांनी सलिल अंकोला यांची जागा घेतली आहे.