Goa Cricket Association Annual Meeting

पणजी: गोवा क्रिकेट असोसिएशनची (जीसीए) गेल्या २० ऑक्टोबर रोजी संस्थगित झालेली वार्षिक आमसभा आता मुंबई उच्च न्यायालयाच्या गोवा खंडपीठाच्या आदेशानुसार येत्या ५ जानेवारी रोजी होणार आहे.

बैठक उच्च न्यायालयाचे वकील ॲड. योगेश नाडकर्णी यांच्या निरीक्षणाखाली घेतली जाईल, अशी माहिती न्यायालयाच्या आदेशानंतर जीसीए सचिव रोहन गावस देसाई यांनी दिली.

जीसीए आमसभेत मागील २० ऑक्टोबर रोजी प्रचंड गदारोळ झाला. त्यामुळे विषय सूचीतील एकही विषय चर्चेस न येता वार्षिक आमसभा संस्थगित झाली. त्यानंतर जीसीए व्यवस्थापकीय समितीने वार्षिक आमसभेची नवी तारीख ठरविली नव्हती.

यानंतर जीसीए अध्यक्ष विपुल फडके यांनी २८ नोव्हेंबर रोजी १५ डिसेंबर रोजी विशेष आमसभेसाठी नोटीस जारी केली. वार्षिक आमसभा न होता विशेष आमसभा घेण्याच्या अध्यक्ष विपुल यांच्या नोटिसीला आव्हान देत जीसीए व्यवस्थापकीय समितीतील सात सदस्यांनी संस्था महानिरीक्षक जिल्हा निबंधक (उत्तर) यांच्याकडे धाव घेतली. संस्था महानिरीक्षक उत्तर जिल्हा निबंधकांनी १३ डिसेंबर रोजी अध्यक्ष विपुल फडके यांनी बोलावलेली विशेष आमसभा कलम २० अ, सोसायटी नोंदणी कायदा १८६० अंतर्गत लांबणीवर टाकण्याचा आदेश दिला. १४ डिसेंबर रोजी जीसीए मुख्य कार्यकारी अधिकारी (सीईओ) हरीश शिंदे यांनी पत्रकाद्वारे १५ डिसेंबर रोजीची विशेष आमसभा रद्द केल्याचे जाहीर केले.

संस्था महानिरीक्षक जिल्हा निबंधक (उत्तर) यांच्या आदेशाला आव्हान देणारी याचिका जीसीए अध्यक्ष विपुल फडके यांनी मुंबई उच्च न्यायालयाच्या गोवा खंडपीठात दाखल झाली. त्यावर सुनावणी होऊन खंडपीठाने संस्थगित आमसभा ५ जानेवारी रोजी उच्च न्यायालय वकिलाच्या निरीक्षणाखाली घेण्याचे आदेश दिले. जीसीए सचिव रोहन देसाई यांनी दिलेल्या माहितीनुसार, २० ऑक्टोबर रोजीच्या वार्षिक आमसभेतील विशेष सूचींवर ५ जानेवारीच्या आमसभेत चर्चा होईल, तसेच अध्यक्ष विपुल यांनी बोलावलेल्या विशेष आमसभेच्या विषय सूचीतील अंतर्गत चौकशी समितीच्या अहवालावर चर्चा करण्यास व्यवस्थापकीय समिती तयार असून तसे आम्ही न्यायालयात मान्य केले आहे. त्यानुसार नव्या तारखेने जीसीएची वार्षिक आमसभा पार पडणार आहे.