पणजी: अखिल गोवा १५ वर्षांखालील राज्यस्तरीय बुद्धिबळ स्पर्धा-निवड चाचणीत खुल्या गटात इंटरनॅशनल मास्टर (आयएम) एथन वाझ व राजवीर पाटील यांनी संयुक्त आघाडी घेतली आहे.

मुलींत सईजा देसाई, वैष्णवी परब व राचेल परेरा यांनी संयुक्त अव्वल कामगिरी बजावली आहे. एथन व राजवीर यांचे प्रत्येकी चार गुण झाले आहेत. सलग चौथा विजय नोंदविताना अव्वल मानांकित एथनने मयुरेश देसाई याच्यावर मात केली.

राजवीरने एड्रिक वाझ याला नमविले. मुलींच्या गटात चौथ्या फेरीत राचेल हिने सईजा हिला बरोबरीत रोखले, तर वैष्णवी हिने काया कुतिन्हो हिला नमवून गुणसंख्या साडेतीनवर नेली.

स्पर्धेचा समारोप रविवारी होईल. सासष्टी तालुका बुद्धिबळ संघटनेने गोवा बुद्धिबळ संघटनेच्या सहकार्याने स्पर्धा घेतली आहे.