इंडियाज गॉट लेटेन्ट नावाच्या शोमुळे वादात सापडलेल्या स्टँडअप कॉमेडियन समय रैना कमबॅक करत आहे. समयने नव्या स्टँडअप टूरची घोषणा केली असून, भारतातून याचा शुभारंभ होणार आहे. वादात सापडलेला इंडियाज गॉट लेटेन्ट शो बंद करावा लागल्यानंतर समयने काही काळासाठी भारतात शो न करता परदेशात शो करण्यास पसंती दिली होती.

समय रैनाने त्याच्या अधिकृत इन्स्टाग्राम हँडलवरुन नव्या स्टँडअप टूरची घोषणा केली आहे. समय रैना जिवंत आहे आणि अनफिल्टर्ड असे त्याच्या नव्या टूरचे नाव आहे.

१५ ऑगस्टपासून बंगळुरु येथून स्टँडपअप शोची सुरुवात होणार आहे. बुक माय शोवरुन या शोसाठी बुकिंग सुरु झाली आहे, अशी माहिती समयने त्याच्या इन्स्टाग्रामवरुन दिली आहे.

असे असतील शो

बंगळुरु: १५ ते १७ ऑगस्ट

हैद्राबाद: २३  आणि २४ ऑगस्ट

मुंबई: ३० ऑगस्ट

कोलकाता: ०६ – ०७ सप्टेंबर

चेन्नई: १९ -२० सप्टेंबर

पुणे: २६ ते २८ सप्टेंबर

दिल्ली: ०३, ०४ आणि ०५ सप्टेंबर

समय परत येताच चाहत्यांनी त्याचे जोरदार स्वागत केले आहे. एका तासांत ४० हजार तिकिटांची विक्री झाल्याचे त्यांने म्हटले आहे. आणि हे एक प्रकारचे रेकॉर्ड आहे. या प्रेमासाठी सर्वांचे मनापासून धन्यवाद, असे त्यांने ठेवलेल्या स्टोरीत नमूद केले आहे.

समयने यापूर्वी युरोप, युके, ऑस्ट्रेलिया, न्यूझीलंड येथे शो केल्यानंतर भारतात शोची घोषणा केली आहे.

समयचा युट्युबवर  सुरु असलेला इंडियाज गॉट लेटेन्ट नावाचा शो वादाच्या भोवऱ्यात सापडला होता. या शोमध्ये अश्लील शेरेबाजी केल्याचा दावा करत त्याच्या विरोधात गुन्हा देखील नोंद झाला होता. याशिवाय अपूर्वा मुखिजा, आशिष चंचलानी आणि रणवीर अलाहबादीया यांच्याविरोधात देखील तक्रार दाखल करण्यात आली होती. रणवीरने केलेल्या अश्लील टिपण्णीनंतर प्रामुख्याने शो वादाच्या भोवऱ्यात सापडला होता.