मुंबई: भारतीय चित्रपटसृष्टीतील ज्येष्ठ आणि लोकप्रिय अभिनेते धर्मेंद्र यांचे आज (सोमवार, २४ नोव्हेंबर) वयाच्या ८९ व्या वर्षी निधन झाले आहे. 'IANS' या वृत्तसंस्थेनं पोस्ट करत त्यांच्या निधनाची माहिती दिलीय. गेल्या काही दिवसांपासून ते आजारपणाशी झुंज देत होते. त्यांच्या निधनामुळे भारतीय सिनेसृष्टीवर आणि कोट्यवधी चाहत्यांमध्ये शोककळा पसरली आहे.

प्रकृती बिघडल्यानंतर उपचार सुरू

अभिनेते धर्मेंद्र यांची प्रकृती काही दिवसांपूर्वी अचानक खालावल्यामुळे त्यांना मुंबईतील ब्रीच कँडी रुग्णालयात दाखल करण्यात आले होते. प्रकृती गंभीर असल्याने त्यांच्यावर रुग्णालयात अनेक दिवस उपचार सुरू होते आणि त्यांना आयसीयूमध्ये व्हेंटिलेटरवर ठेवण्यात आले होते.

तरीही, त्यांच्या प्रकृतीत थोडी सुधारणा झाल्यानंतर, त्यांच्या कुटुंबीयांनी त्यांना घरी आणून उपचार सुरू ठेवण्याचा निर्णय घेतला होता. घरी उपचार सुरू असतानाच त्यांची प्राणज्योत मालवली.

अफवांवर कुटुंबियांनी केले होते खंडन

गेल्या काही दिवसांपूर्वी धर्मेंद्र यांची प्रकृती अत्यंत नाजूक असल्याच्या बातम्या प्रसारमाध्यमांमध्ये आणि समाज माध्यमांवर फिरत होत्या. एवढेच नव्हे तर, त्यांचे निधन झाल्याच्या अफवा देखील मोठ्या प्रमाणात पसरल्या होत्या. मात्र, त्यावेळी त्यांच्या कुटुंबीयांनी या बातम्यांचे खंडन करत त्या केवळ अफवा असल्याचे स्पष्ट केले होते.