केपे: कुडचडे मतदारसंघात यावेळी निवडणूक रिंगणात एकूण सहा उमेदवार उरले असून त्यांच्यात लढत होणार आहे. कुडचडेत दोन वेळा निवडून आलेले भाजपचे उमेदवार नीलेश काब्राल आणि काँग्रेसच्या (Congress) उमेदवारीवर पहिल्यांदा निवडणूक लढवणारे अमित पाटकर यांच्यातील लढतीकडे सर्वांचे लक्ष लागून राहिले आहे. (Goa Election News)

भाजप (BJP) मधून नीलेश काब्राल, काँग्रेस मधून अमित पाटकर, मगोप मधून विठोबा (आनंद) प्रभुदेसाई, आप मधून गाब्रियल फर्नाडिस, आरजीतर्फे आदित्य देसाई तर अपक्ष म्हणून अजय बॉयर कुडचडेतून निवडणुकीत उतरले आहेत.

नीलेश काब्राल हे या मतदारसंघातील बलाढय उमेदवार असून ते सलग दोनदा भाजपच्या उमेदवारीवर कुडचडेतून विजयी झाले आहेत. काब्राल यांना या मतदारसंघात फक्त काँग्रेस उमेदवार प्रतिस्पर्धी असतो. यावेळी काँग्रेसने अमित पाटकर हा नवीन चेहरा देण्याचा डाव खेळला असून तो काब्राल यांच्यावर विरोधात कितपत भारी ठरू शकतो, हे दिसून येणार आहे. गेल्यावेळी काब्राल यांचे जुने प्रतिस्पर्धी श्याम सातार्डेकर यांनी गोसुमं कडून काब्राल विरोधात निवडणूक लढवली होती. यंदा त्यांनी आपला पाठिंबा पाटकर यांना दिला आहे. 'आप'ने (AAP) 2017 च्या निवडणुकीत जेम्स फर्नाडिस यांना उमेदवारी दिली होती. त्यांना केवळ दहा टक्के मते मिळाली होती. यंदा त्यांच्या जागी गाब्रियाल फेर्नांडिस यांना उमेदवारी देण्यात आलेली आहे.