पणजी : भाजपने प्रत्येक क्षेत्रात राज्यातील लोकांचा विश्वासघात केलेला असून, कोविड काळात लोकांचा जीव घेतला, या कारणामुळे भाजपला लोक पराभूत करणार, असा निशाणा महाराष्ट्र प्रदेश काँग्रेसचे अध्यक्ष नाना पटोले यांनी बुधवारी म्हटले. भाजपचा खरा चेहरा लोकांसमोर उघड झाला आहे, असेही पटोले म्हणाले. पणजीत आयोजित केलेल्या पत्रकार परिषदेत त्यांनी भाजपवर सडकून टीका केली. (Nana Patole allegations on BJP News Updates)

भाजपच्या गैरकारभारामुळे गोव्यातील जनता त्रस्त झाली आहे. प्रत्येक क्षेत्रात लोकांना त्रास सहन करावा लागला आहे, त्यामुळे मतदार भाजपचा पराभव करुन काँग्रेसला निवडून देतील, असा विश्वासही पटोलेंनी व्यक्त केला. भाजप सरकारने कोविड रुग्णांची हत्या केली, त्यासाठी त्यांना जबाबदार धरले पाहिजे आणि मला खात्री आहे की गोव्यातील लोक त्यांचा पराभव करतील, अशा शब्दात पटोलेंनी भाजपवर निशाणा साधला.

भाजपने राज्यातील खनिज व्यवसाय बंद केल्याचा आरोपही नाना पटोलेंनी केला आहे. भाजपने खनिज व्यवसाय बंद करुन लोकांना त्रास दिला. तसेच भाजप सरकारने आरोग्य क्षेत्रातही भ्रष्टाचार केला आहे, असंही ते पुढे म्हणाले.

आगामी निवडणुकीत पणजीची जागाही काँग्रेसच जिंकेल, असे ते म्हणाले. 'आम्ही पणजीचे माजी महापौर उदय मडकईकर यांना भेटलो आहे आणि आम्हाला विश्वास आहेत ते आमच्यासोबत राहणार. पणजीशिवाय शेजारच्या मतदारसंघातही ते आम्हाला मदत करतील.’’ असे पटोले म्हणाले.

नाना पटोले म्हणाले की, ते साखळी मतदारसंघामध्ये प्रचारासाठी घरोघरी फिरले असता त्यांना कळाले की जनता भाजपवर नाराज आहे आणि त्यांचा पराभव नक्की करणार. लोक मला सांगत होते की मुख्यमंत्री प्रमोद सावंत हे सर्वात श्रीमंत व्यक्ती बनले आहेत, ज्यांच्याकडे राजकारणाच्या सुरुवातीच्या काळात एकच वॅगन-आर गाडी होती. त्यांनी संपत्ती कशी मिळवली हे लोकांना माहीत आहे आणि भाजपविरोधातील हा राग त्यांना घरी पाठवेल, असा टोलाही पटोलेंनी लगावला.