पणजी: पणजी मतदारसंघात भाजपच्या बाबूश मोन्सेरात यांनी उत्पल पर्रीकर यांचा 713 मतांनी पराभव केला आहे. निकालानंतर प्रतिक्रिया देताना पर्रीकर म्हणाले, एक अपक्ष उमेदवार म्हणून मी चांगली लढत दिली. सर्व मतदारांचे मी आभार मानतो. गोवा विधानसभा निवडणुकीची ही लढाई समाधानी होती. मात्र, पराभव किंचित निराशाजनक आहे.

पणजीत उत्पल पर्रीकर यांच्या पाठीशी अनेक भाजप समर्थक उभे होते. मात्र पर्रीकर यांना विजय खेचून आणता आला नाही. पणजीतील लोकांनी बाबूश मोन्सेरात यांना पसंती दिली. भाजपने (BJP) पणजीतून तिकीट नाकारल्याने उत्पल पर्रीकर (Utpal Parrikar) यांनी अपक्ष निवडणूक लढवण्याचा निर्णय घेतला होता. भाजप त्यांना पणजी व्यतिरिक्त इतर मतदारसंघातून उमेदवारी देण्यास तयार होता.

मात्र पर्रीकर यांनी सर्व 'ऑफर्स' नाकारल्या. त्याचबरोबर शिवसेनेने पर्रीकर यांना जाहीर पाठिंबा देत आपल्या उमेदवाराला माघार घ्यायला लावला होता. आम आदमी पार्टीने देखील पर्रीकर यांना पक्षात सामील होण्याचे आमंत्रण दिले होते. मात्र त्यांनी स्वबळावर निवडणूक लढवली. पण त्यांच्या पदरी निराशाच पडली.

प्रचारादरम्यान बाबूश मोन्सेरात यांनी विजय संपादन करण्याचा दावा केला होता. त्यांचा हा दावा अखेर खरा ठरला. पणजीच्या (Panaji) जनतेने मोन्सेरात यांना विजयी केले. भाजप समर्थक आणि नेते या निकालानंतर आनंद व्यक्त करत आहेत.