काणकोण: काणकोणचे भाजपचे उमेदवार रमेश तवडकर यांनी तालुक्याच्या भविष्याला चालना देणारा जाहीरनामा तुमच्या समोर मांडला आहे. काणकोणच्या जनतेला समर्पित असा हा जाहीरनामा आहे, असे प्रतिपादन मुंबईहून आलेले आमदार गायकवाड यांनी केले. काणकोण येथील जुन्या बसस्थानकावर आयोजित जाहीर सभेत ते बोलत होते.

काणकोण भाजपच्या जाहिरनाम्याचे प्रकाशन आमदार गायकवाड यांच्या हस्ते करण्यात आले. यावेळी व्यासपीठावर उमेदवार रमेश तवडकर, नगराध्यक्ष सायमन रिबेलो,‌ माजी आमदार सुनिल हेगडे, माजी नगराध्यक्ष रमाकांत नाईक गावकर, नगरसेवक बाकल पागी, मनुजा नाईक गावकर, चंदा देसाई आदी मान्यवर उपस्थित होते. गायकवाड पुढे म्हणाले, की गोव्यात स्थिर सरकार येणे आवश्यक आहे. तरच विकास होऊ शकतो. भाजप जेव्हा जाहीरनाम्यात एखाद्या गोष्टीचा समावेश करते ती गोष्ट पूर्ण करण्याकरता प्रयत्नकरते.

उमेदवार तवडकर म्हणाले, की काणकोणचा सर्वागिण विकास हे माझे ध्येय आहे. सर्वांना बरोबर घेऊन पुढे जाईन. जाहीरनाम्यातील कामे प्राधान्याने हाती घेतली जातील. चोवीस तास पाणी, पाळोळे - आगोंद किनाऱ्याचे सुशोभीकरण, चापोली, गावणे धरणे पर्यटन स्थळे बनविणे, रोजगाराच्या संधी निर्माण करणे हे माझे ध्येय आहे. या सभेला स्थानिक पदाधिकारी, कार्यकर्ते आणि नागरिक मोठ्या संख्येने उपस्थित होते.