मडगाव: शेवटची निवडणूक लढविणारे आमदार चर्चिल आलेमाव आणि त्यांचा तृणमूल काँग्रेस पक्ष या दोघांचीही राजकीय इभ्रत जिथे पणाला लागली आहे, त्या बाणावली मतदारसंघात राज्यात सर्वांत कमी म्हणजे 70 टक्के मतदान झाले. त्यामुळे चर्चिल आपली ही शेवटची इनिंग यशस्वीपणे पूर्ण करतील, की या शेवटच्या डावात त्यांचा सपशेल पराभव होणार हे आता 10 मार्च रोजीच स्पष्ट होणार आहे.

मागच्या काही दिवसांत या मतदारसंघातून पैशांचा धूर निघत होता. साम, दाम, दंड, भेद नीती सर्व उमेदवारांनी वापरली असली तरी या मतदारसंघात मतदार नेमका कुणाच्या बाजूने आहे, हा अंदाज लावणे कठीण झाले आहे. आवाज न करणारे मतदार कुणाच्या पारड्यात दान टाकणार, यावर आता सर्वांची मदार आहे. चर्चिल आलेमाव यांच्यासह या मतदारसंघात ‘आप’चे वेंझी व्हिएगस आणि काँग्रेसचे (congress) टोनी डायस अशी तिरंगी लढत होणार असून यात कुणाची सरशी होणार हे निकालातूनच स्पष्ट होणार आहे.