पणजी: गोवा विधानसभा निवडणुकीत सर्वच उमेदवार आपल्या विजयाचा दावा करत आहेत. यातच आता साखळीतून निवडणूक लढवलेल्या मुख्यमंत्री प्रमोद सावंत यांनी आपल्या विजयाचे भाकीत केले आहे. मुख्यमंत्री सावंत म्हणाले, गोवा विधानसभा ​निवडणुकीत माझा पराभव व्हावा म्हणून सर्व विरोधी पक्षांनी प्रयत्न केले. मात्र, याचा काहीही फायदा होणार नाही. मी साखळीतून पाच हजार मताधिक्याने निवडून येणार. (Goa Election News)

2012 च्या विधानसभा निवडणुकीत अनेक दिग्गज काँग्रेस नेत्यांनी साखळीत प्रचार करून देखील माझाच विजय झाला होता. त्यावेळी मी सात हजार मतांनी निवडून आलो होतो.यावेळी पाच हजार मताधिक्याने ​निवडून येणार, असे मुख्यमंत्री म्हणाले.

मुख्यमंत्री सावंत दिल्लीला रवाना
गोवा विधानसभा निवडणुकीच्या निकालाच्या पार्श्वभूमीवर राज्यचे मुख्यमंत्री आणि भाजप नेते प्रमोद सावंत (Pramod Sawant) पंतप्रधान नरेंद्र मोदी यांची भेट घेण्यास दिल्लीला रवाना झाले आहेत. मंगळवारी सावंत आणि प्रधानमंत्री मंत्री मोदी यांची भेट होणार आहे. याचबरोबर मुख्यमंत्री सावंत आणि गोवा भाजप प्रदेश अध्यक्ष सदानंद शेट तानावडे देवेंद्र फडणवीस यांची भेट घेणार असल्याची माहिती समोर येत आहे. गुरुवारी 10 तारखेला गोव्याच्या जनतेने कुणाला कौल दिला आहे हे स्पष्ट होणार आहे.

गोव्यात कॉंग्रेसचे पारडे जड?
देशातील बहुसंख्य माध्यम समूहाने केलेल्या जनमत चाचण्यांच्या आधारे गोव्यात काँग्रेस (Congress) आणि गोवा फॉरवर्डच्या आघाडीला सर्वाधिक 16 ते 18 जागा मिळतील तर भाजपला 14 ते 16 जागा मिळतील असे भाकित वर्तवण्यात आले आहे. त्यामुळे गोव्यात (Goa) 2017 प्रमाणेच त्रिशंकू विधानसभा अस्तित्वात येईल असे अंदाज या चाचण्यांमधून पुढे येत आहे. यामुळे मगोप-तृणमूल काँग्रेस, आम आदमी पक्ष आणि अपक्षांचे महत्त्व वाढणार असून ते सत्तेत महत्वाची भूमिका बजावणार असा अंदाज आहे.