पणजी: गोवा विधानसभा निवडणुकीत कॉंग्रेसचा दारुण पराभव झाला आहे. पक्षाला 11 जागांवर समाधान मानावे लागले. या पराभवाची जबाबदारी स्वीकारत गिरीश चोडणकर यांनी गोवा कॉंग्रेस प्रदेशाध्यक्षपद सोडण्याची तयारी दाखवली आहे.

चोडणकर म्हणाले, "जनतेने भाजपला कौल दिला आहे. आम्हाला गोवेकरांचा निर्णय मान्य आहे. मी या पराभवाची जबाबदारी स्वीकारत गोवा कॉंग्रेस (Congress) प्रदेशाध्यक्षपद सोडण्यास तयार आहे." काँग्रेसचे 7 ते 9 उमेदवार मतांच्या विभागणीमुळे हरल्याचा दावाही त्यांनी केला.

या निवडणुकीत तरुण, नव्या आणि शिक्षित उमेदवारांनी चांगली कामगिरी बजावली आहे. त्यामुळे गोव्यात एक जबाबदार विरोधीपक्ष म्हणून काँग्रेस कामगिरी बजावेल, असे वक्तव्य गोवा काँग्रेस प्रभारी दिनेश गुंडू राव यांनी केले आहे. मात्र हा निकाल अनपेक्षित आहे असेही ते पुढे म्हणाले.

आम्हाला गोव्यात काही मतदारसंघात खूप कमी फरकाने पराभव स्वीकारावा लागला आहे. गोव्यातील (Goa) जनतेने राज्याची धुरा पुन्हा भाजपच्या (BJP) हातात सोपवण्याचा निर्णय दिला आहे आणि आम्हाला तो मान्य आहे, असं पी चिदंबरम म्हणाले.