मडगाव Goa Politics: मडगावात भाजपची उमेदवारी येथील बिल्डर डॉ. देश प्रभुदेसाई यांना देण्यावर शिक्कामोर्तब झाले असून प्रदेशाध्यक्ष सदानंद शेट तानावडे यांनी या वृत्ताला दुजोरा दिला आहे.

दोन दिवसांपूर्वी पणजीत (Panjim) झालेल्या एका बैठकीत डॉ. प्रभुदेसाई यांचे नाव उमेदवारीसाठी सुचविण्यात आले. ते एकमताने संमत झाले, असे सांगण्यात आले. मडगाव (Margao) भाजप (BJP) मंडळाचे अध्यक्ष रूपेश महात्मे व अन्य पदाधिकारी या बैठकीस उपस्थित होते. भाजपचे संघटन सचिव सतीश धोंड यांनी हे नाव सुचविल्याची माहिती प्राप्त झाली.

दरम्यान, डॉ. प्रभुदेसाई यांना मडगावची उमेदवारी दिल्याने मडगावातील भाजप कार्यकर्त्यांचा एक गट तीव्र नाराज झाला असून डॉ. प्रभुदेसाई हे सक्रिय राजकारणातून गेली कित्येक वर्षे बाजूला होते. असे असतानाही राजकारणात सक्रिय असलेल्यांना बाजूला ठेवून त्यांना उमेदवारी दिल्यामुळे काही कार्यकर्त्यांनी नाराजी व्यक्त केली आहे. डॉ. प्रभुदेसाई यांना उमेदवारी दिल्याने मडगाव भाजपमध्ये पुन्हा बंडाळी माजण्याची शक्यता व्यक्त केली जात आहे.