राज्यात सत्तेत असलेल्या भाजपला(BJP) आगामी निवडणुकीत (Goa Election) बदलण्याची मागणी प्रत्येक नागरिकाकडून होत आहे. गोमंतकीयांनी आम आदमी पक्षाला (AAP) एक संधी द्यावी, दिलेली सर्व आश्‍‍वासने पूर्ण करू, अशी ग्‍वाही पक्षाचे गोवा संयोजक राहुल म्हांबरे (Rahul Mhambare) यांनी दिली आहे. (Give chance to form government in Goa says AAP leader Rahul Mhambare)

कुडतरी मतदारसंघात ‘आप’ने आयोजित केलेल्या परिवर्तनयात्रेत म्‍हांबरे बोलत होते. यावेळी ‘आप’चे स्थानिक नेते तथा जिल्हा पंचायत सदस्य डॉम्‍निक गावकर, रॉक मास्कारेन्‍हस व कार्यकर्ते उपस्थित होते. राज्यात महागाई वाढत चालली आहे. यामुळे गोव्यातील प्रत्येक गरीब कुटुंबाला वर्षाला एक लाख रुपये गमवावे लागत आहे. गोमंतकीयांनी ‘आप’ला सत्तेवर आणल्‍यास प्रत्येक घराचे वर्षाला पाच लाख रुपये वाचतील, असा दावा म्हांबरे यांनी केला आहे.

डॉम्‍निक गावकर म्‍हणाले की, सुरूवातीला आपण अपक्ष म्‍हणूनच निवडणूक लढविण्याचा निर्णय घेतला होता. पण, नंतर आम आदमी पक्षाने दिल्लीत केलेले कार्य पाहून भारावून गेलो. तसेच कार्य व सेवा गोमंतकीयांना मिळावी यासाठी ‘आप’च्‍या उमेदवारीवर निवडणूक लढविण्याचा निर्णय घेतला आहे. आपण गेल्या कित्येक वर्षांपासून लोकांच्या भल्यासाठी काम करत आहे. आमदार म्हणून निवडून आल्यास लोकांची कामे करण्याची आणखी संधी मिळेल.

दरम्यान राज्यातील आगामी विधानसभा निवडणुकीच्या आधी ‘आप’ने घरोघरी जाऊन प्रचार सुरू केला आहे. मोफत वीज आणि मोफत तीर्थयात्रेच्या हमींवर पक्षाला चांगला प्रतिसाद मिळत आहे, असा दावाही आपने केला आहे.