पणजी : ज्येष्ठ काँग्रेस नेते प्रतापसिंग राणे यांना पर्ये मतदारसंघातून कॉंग्रेसची उमेदवारी जाहीर करण्यात आली आहे. ऑल इंडिया काँग्रेस कमिटीचे जनरल सेक्रेटरी मुकुल वासनिक एका प्रसिद्धी पत्रकाद्वारे ही घोषणा केली आहे.

गोव्यात विधानसभा निवडणूकीच्या पार्श्वभूमीवर मोठी चुरस निर्माण होताना दिसत आहे. प्रतापसिंग राणेंचा (Pratapsingh Rane) पर्ये मतदार संघही सध्या गोवेकरांच्या चर्चेचा विषय ठरत आहे. राज्याचे आरोग्यमंत्री विश्वजित राणे यांच्याविरोधात पर्ये मतदार संघातून निडणूक लढवणार असल्याची घोषणा कॉंग्रेसचे (Congress) ज्येष्ठ नेते प्रतापसिंह राणे यांनी केली आहे. त्यातच पक्षाने त्यांची उमेदवारी जाहीर केल्याने त्यावर शिक्कामोर्तब झाले आहे.

प्रतापसिंग राणे यांनी मंगळवारी सकाळी विधानसभा निवडणूक आपण काँग्रेसच्याच उमेदवारीवर पर्ये मतदारसंघातून लढवणार असल्याचे जाहीर केले होते. त्यावरून राणे पितापुत्रांमध्ये दिवसभर रणकंदन माजले होते.

दरम्यान विश्वजीत राणेंनी (Vishwajit Rane) प्रतापसिंग राणेंना रणांगणात हार पत्करण्यापेक्षा सन्मानाने निवृत्त होण्याचा सल्लाही दिला होता. मात्र प्रतापसिंग राणेंनी तो धुडकावत निवडणूक लढणवणार असल्याचं स्पष्ट केलं आहे. त्यामुळे पर्ये मतदारसंघात आता पिता-पुत्र अशी रंगतदार लढत होणार आहे.