पणजी: आगामी गोवा विधानसभा निवडणुकीच्या पार्श्वभूमीवर पक्षाचा प्रचार करण्यासाठी अनेक नेते गोव्यात दाखल होत आहेत. दरम्यान, दिल्लीचे उपमुख्यमंत्री आणि आप नेते मनीष सिसोदिया आज (शनिवार) गोव्यात आले आहेत. सिसोदिया गोव्यात आम आदमी पार्टीच्या उमेदवारांचा प्रचार करणार आहेत. (Goa Assembly Election 2022)

विमानतळावर पत्रकारांशी बोलताना सिसोदिया म्हणाले, आम आदमी पार्टी गोव्याला भ्रष्टाचार मुक्त सरकार देण्यास प्रयत्नशील आहे. ते पुढे म्हणाले, गोव्यातील लोकांनी कोंग्रेस (Congress) आणि भाजपला अनेक वेळा संधी दिली आहे. त्यांनी आपला एक संधी द्यावी. आम्ही गोव्याला स्थिर सरकार देऊ.

आपचे सर्वेसर्वा आणि दिल्लीचे मुख्यमंत्री अरविंद केजरीवाल (Arvind Kejriwal) देखील गोव्यात पार्टीचा प्रचार करत आहेत. त्यांनी विश्वास दर्शवला आहे की राज्यात आपला बहुमत मिळेल. गोव्यात केजरीवाल अन्य पक्षांबरोबर युती करणार का, असे पत्रकारांनी विचारले असता त्यांनी उलट प्रश्न केला की, कोणासोबत युती करायची? गोव्याला काँग्रेसने (Congress) 25 वर्षे लुटले. भाजपने देखील गोव्याला लुटण्याशिवाय दुसरे काहीही केलेले नाही. लोकांनी आपला एक संधी द्यावी. सध्या सर्वच पक्षांच्या उमेदवारांवर भ्रष्टाचाराचे आरोप आहेत. आम्हाला जनतेने निवडून दिल्यास आम्ही गोव्याला प्रामाणिक सरकार देऊ, असे केजरीवाल म्हणाले. आगामी काळात अनेक दिग्गज नेते गोवा (Goa) दौऱ्यावर येणार आहेत. यामध्ये अमित शहा, नितीन गडकरी, प्रियंका गांधी यांचा समावेश आहे.