Three Kings Feast Goa: ६ जानेवारी रोजी संपूर्ण गोव्यातील कॅथोलिक समुदायाद्वारे 'एपि फनी' म्हणजेच थ्री किंग्सचा सण साजरा केला जातोय. पूर्वेकडून आलेल्या तीन राजांनीबाल येशूचे दर्शन घेतले आणि त्याला सोने, गंधरस व ऊद अर्पण केले, या घटनेची स्मृती म्हणून हा सण साजरा होतो. गोव्यात प्रामुख्याने रेईस मागोस, चांदोर आणि कासावली येथे हा उत्सव अत्यंत अनोख्या पद्धतीने आणि पारंपरिक थाटात साजरा केला जात आहे.

१. रेईस मागोस चर्च (Reis Magos Church)

बार्देशमधील १५५५ मध्ये बांधलेले हे सर्वात जुने चर्च आज भक्तीने न्हाऊन निघाले आहे. यंदा जोएल फर्नांडिस, मॅन्युअल रॉड्रिग्स आणि जोआकिम मोरेरा या युवकांनी 'तिन्ही राजां'चे रूप साकारले आहे. अनेक वर्षांच्या खंडानंतर यंदा राजे घोड्यावरून पारंपरिक मिरवणुकीने येणार आहेत. सकाळी ९.३० वाजता गोव्याचे सहाय्यक बिशप सिमिआंव फर्नांडिस यांच्या मुख्य उपस्थितीत हाय मास पार पडला. आजच्या दिवशी ऐतिहासिक रेईस मागोस किल्ल्यावर सर्व पर्यटकांना मोफत प्रवेश दिला जात आहे.

२. चांदोर (Igreja Nossa Senhora de Belem)

चांदोरमध्ये या सणाला सांस्कृतिक आणि धार्मिक अशा दोन्ही बाजू आहेत. शॉन जोयस्टन मास्कारेन्हास, ॲशले वाझ आणि लायोनेल मेंडिस या युवकांना राजांचा मान मिळाला आहे. आज संध्याकाळी चांदोरमध्ये पारंपरिक 'मुसळ खेळ' सादर केला जाणार आहे, जो क्षत्रिय वंशाच्या कुटुंबांद्वारे अनेक शतकांपासून केला जातो. माऊंट युथ असोसिएशनतर्फे २५ व्या वर्षानिमित्त विशेष महोत्सवाचे आयोजन करण्यात आले आहे.

३. कासावली (Three Kings' Chapel)

कासावली पॅरिश अंतर्गत येणाऱ्या येथील डोंगरावरील चॅपलमध्ये पहाटे ५ वाजल्यापासून प्रार्थनासभा सुरू झाल्या आहेत. जेडन फर्नांडिस, लियम वाझ आणि अझरिया डि सिल्वा या तीन मुलांची राजा म्हणून निवड झाली आहे. सकाळी १०.३० वाजता राशोल चर्चचे पॅरिश प्रीस्ट फादर अँथनी रॉड्रिग्स यांच्या नेतृत्वाखाली विशेष प्रार्थना झाली.