China Crime News: चीनमधून एक धक्कादायक बातमी समोर आली आहे. दक्षिण-पश्चिम चीनमधील रुग्णालयात एका माथेफिरुने लोकांवर चाकूने हल्ला केला. या घटनेत 10 जणांचा मृत्यू झाला असून 23 जण जखमी झाले आहेत. हल्लेखोराचा व्हिडिओ सोशल मीडियावर व्हायरल झाला आहे. या घटनेबाबत समोर आलेल्या सीसीटीव्ही फुटेजमध्ये एक व्यक्ती रुग्णालयाच्या (Hospital) परिसरात हातात चाकू घेऊन फिरताना दिसत आहे. चीनच्या अधिकृत वृत्तसंस्थेने माहिती देताना सांगितले की, युनान प्रांतात मंगळवारी ही घटना घडली.

एक संशयित अटक

अज्ञात अधिकाऱ्यांचा हवाला देत गुइझोउ प्रांतीय टेलिव्हिजनच्या ऑनलाइन पोस्टने सांगितले की, या हल्ल्यात सुमारे 23 लोक जखमी झाले आहेत. एका संशयिताला अटक करण्यात आल्याचेही पोस्टमध्ये म्हटले आहे. झाओटाँग शहरातील झेंक्सिओंग काउंटी पीपल्स हॉस्पिटलमध्ये हा हल्ला झाला. या हल्ल्यामागे नेमके काय कारण होते आणि हल्लेखोराचा हेतू काय होता याचा तपास केला जात आहे. चीनच्या (China) नैऋत्य युनान प्रांतातील जेनक्सिओंग काउंटीमध्ये ही घटना घडली.

चीनमध्ये घटना वाढल्या आहेत

अलीकडच्या काळात चीनमध्ये अशा घटना वाढल्या आहेत. गेल्या वर्षी ऑगस्ट महिन्यात युनान प्रांतात एका व्यक्तीने लोकांवर चाकूने हल्ला केला होता. या हल्ल्यात दोन जण ठार तर सात जण जखमी झाले होते. गेल्या वर्षी सप्टेंबर महिन्यात दक्षिण चीनमधील ग्वांगडोंग प्रांतातील किंडरगार्टनमध्ये चाकूने हल्ला करुन सहा जणांचा मृत्यू झाला होता तर एक जण जखमी झाला होता.