South Africa Accident: दक्षिण आफ्रिकेतून गुरुवारी (29 जानेवारी) एक अत्यंत भीषण आणि काळजाचा थरकाप उडवणारी अपघाताची घटना समोर आली. देशाच्या पूर्व क्वाजुलु-नेटाल प्रांतातील डरबन शहराच्या जवळ एका मिनीबस आणि ट्रकची समोरासमोर जोरदार धडक झाली. या भीषण अपघातात तब्बल 11 जणांचा जागीच मृत्यू झाला. मृतांमध्ये एका शालेय विद्यार्थ्याचाही समावेश आहे.

दक्षिण आफ्रिकेच्या (South Africa) स्थानिक सरकारी अधिकाऱ्यांनी आणि आपत्कालीन सेवांनी या घटनेची अधिकृत माहिती दिली. धक्कादायक बाब म्हणजे गेल्या आठवड्यात अशाच प्रकारच्या एका अपघातात 14 शालेय मुलांचा मृत्यू झाल्याची घटना ताजी असतानाच, पुन्हा एकदा अशाच भीषण दुर्घटनेने देश हादरला आहे.

प्रांतीय परिवहन विभागाचे अधिकारी सिबोनिसो दूमा यांनी दिलेल्या माहितीनुसार, हा अपघात इतका भयानक होता की 11 प्रवाशांचा जागीच अंत झाला. प्रत्यक्षदर्शींनी दिलेल्या माहितीनुसार, ट्रक चालकाने अचानक 'यू-टर्न' घेण्याचा प्रयत्न केला, ज्याकडे मिनीबस चालकाचे लक्ष गेले नाही आणि ही भीषण धडक झाली. खासगी पॅरामेडिक सेवा पुरवठादार एएलएस पॅरामेडिक्सच्या प्रवक्त्यांनी सांगितले की, अपघातात अनेक जण गंभीर जखमी झाले आहेत. मिनीबसचा चालक गाडीच्या ढिगाऱ्यात अडकून पडला होता, त्याला बाहेर काढून उपचारासाठी रुग्णालयात दाखल करण्यात आले. मृतांचा आकडा आणखी वाढण्याची भीती व्यक्त केली जात आहे.

दक्षिण आफ्रिकेसाठी हा आठवडा अपघातांच्या दृष्टीने अत्यंत दुर्दैवी ठरला आहे. याआधी 19 जानेवारी रोजी जोहान्सबर्गच्या जवळ शालेय मुलांनी भरलेल्या मिनीबसचा असाच एका ट्रकशी भीषण अपघात झाला होता. त्या घटनेत 14 चिमुरड्यांचा बळी गेला होता. त्या प्रकरणातील 22 वर्षीय मिनीबस चालकावर बेजबाबदारपणे वाहन चालवल्याचा आणि चुकीच्या पद्धतीने ओव्हरटेक करण्याचा ठपका ठेवत त्याला अटक करण्यात आली.

त्याच्यावर हत्येचा गुन्हा दाखल करण्यात आला. दक्षिण आफ्रिकेमध्ये मिनीबस टॅक्सी हे सार्वजनिक वाहतुकीचे सर्वात मोठे साधन मानले जाते. जवळपास 70 टक्के नागरिक कामावर जाण्यासाठी किंवा प्रवासासाठी याच वाहनांचा वापर करतात, मात्र वारंवार होणाऱ्या अशा अपघातांमुळे प्रवाशांच्या सुरक्षिततेचा प्रश्न पुन्हा एकदा ऐरणीवर आला आहे.