Kashmir Solidarity Day: पाकिस्तान सध्या आर्थिक संकटाबरोबर राजकीय संकटाचा सामना करत आहे. पण तरीही तेथील जनता 5 फेब्रुवारीला काश्मीर एकता दिवस साजरा करणार आहे. या दिवशी, संपूर्ण पाकिस्तानमध्ये सार्वजनिक सुट्टी असेल आणि देशभरात मोठ्या प्रमाणावर रॅली आणि कार्यक्रम आयोजित केले जातील.

दरम्यान, काश्मीर एकता दिवस साजरा करण्यासाठी पाकिस्तान सोशल मीडियावर भारताविरुद्ध खोटे व्हिडिओ शेअर करत आहे. विशेष म्हणजे, दिशाभूल करणाऱ्या प्रचारासाठी टूलकिट तयार करत असल्याच्याही बातम्या आहेत. पाकिस्तान अजूनही भारतविरोधी षडयंत्रासाठी पैसा खर्च करत असल्याचे सूत्रांचे म्हणणे आहे.

मानवी श्रृंखला तयार करणार

जमात-ए-इस्लामीचे कार्यकर्ते पीओकेमधील प्रमुख रस्त्यांवर मानवी श्रृंखला तयार करतील. ते येथे रॅली, परिषदा आणि सांस्कृतिक कार्यक्रम आयोजित करणार आहेत. जमात-ए-इस्लामी (JI) पक्षाचे कार्यकर्ते लाहोरमधील (Lahore) लिबर्टी चौक ते पंजाब असेंब्ली हॉलपर्यंत मोर्चा काढणार आहेत.

काश्मीर एकता दिवस साजरा करणार

पाकिस्तान (Pakistan) आणि आझाद काश्मीरमधील लोक दरवर्षी 5 फेब्रुवारीला काश्मीर एकता दिवस साजरा करतात. या दिवशी राजकीय पक्ष आणि संघटनांकडून सार्वजनिक चौक, प्रमुख मशिदी, प्रमुख रस्ते आणि विद्यापीठ परिसरातून रॅली काढली जाईल. यावेळी भारतीय उच्चायुक्तालयातूनही ही रॅली काढली जाण्याची शक्यता आहे.

परकीय चलन साठा शिल्लक नाही!

पाकिस्तानच्या मध्यवर्ती बँकेकडे फक्त $3.09 अब्ज एवढी परकीय गंगाजळी उरली आहे. पाकिस्तानकडे फारसा पैसा शिल्लक नाही. दुसरीकडे, IMF ला पाकिस्तानची बजेट तूट भरुन काढायची आहे, त्यामुळे ते संपूर्ण देशाचे बजेट नियंत्रित करतील.