Dominican Republic Plane Crash Video: डोमिनिका रिपब्लिकमधील ला रोमाना आंतरराष्ट्रीय विमानतळावर एक अत्यंत भीषण आणि थरारक विमान अपघात झाला. एका खाजगी विमानाचे इमर्जन्सी लँडिंग करत असताना ते धावपट्टीवर कोसळले आणि क्षणात विमानाने पेट घेतला. हा अपघात इतका भयानक होता की, कोसळताच विमानाचा मोठा स्फोट झाला आणि संपूर्ण विमानाचे रुपांतर एका आगीच्या गोळ्यात झाले. या दुर्दैवी घटनेत विमानाचे मुख्य पायलट आणि को-पायलट या दोघांचाही जागीच होरपळून मृत्यू झाला. सुदैवाने, अपघात झाला तेव्हा या विमानात एकही प्रवासी स्वार नव्हता, ज्यामुळे खूप मोठी जीवितहानी टळली.

मिळालेल्या माहितीनुसार, अमेरिकेत नोंदणीकृत असलेले हे 'गल्फस्ट्रीम G200' मॉडेलचे खाजगी जेट प्यूर्टो रिको येथील ऐबोनिटो एव्हिएशन या कंपनीकडून चालवले जात होते. हे विमान टेक्सासला जाण्यासाठी निघाले होते. मात्र, ला रोमाना विमानतळावरुन टेकऑफ केल्यानंतर अवघ्या काही मिनिटांतच, विमान सुमारे 16 नॉटिकल मैल दूर असताना वैमानिकांना त्यात गंभीर तांत्रिक बिघाड झाल्याचे जाणवले. विमानाचे इंजिन निकामी झाले किंवा हायड्रॉलिक यंत्रणेत बिघाड झाल्याची प्राथमिक माहिती समोर आली.

प्रसंगावधान राखून क्रू मेंबर्सनी विमान पुन्हा विमानतळावर आणून रनवे 29 वर इमर्जन्सी लँडिंग करण्याचा प्रयत्न केला. मात्र, हे लँडिंग अत्यंत वेगात आणि 'हार्ड लँडिंग' ठरल्यामुळे विमान धावपट्टीवरुन घसरत गेले. त्यानंतर विमानाने पेट घेतला. या अपघातात (Accident) जीव गमावलेल्या दोन्ही वैमानिकांची ओळख एरिक जेवियर डियागो आणि रुडी गजल अशी पटली.

या अपघातात 'मेजर लीग बेसबॉल'चे दिग्गज स्टार खेळाडू यादियर मोलिना आणि त्यांचे कुटुंब बचावले. मोलिना यांनी स्वतः सोशल मीडियावर सांगितले की, हे खाजगी जेट त्यांना, त्यांच्या कुटुंबाला आणि मित्रांना घेण्यासाठीच प्यूर्टो रिकोहून येत होते. जर विमान वेळेत पोहोचले असते, तर ते सर्वजण याच विमानाने प्रवास करणार होते, परंतु निसर्गाच्या कृपेने ते या भीषण अपघातातून वाचले. सध्या सोशल मीडियावर या अपघाताचे अनेक अंगावर काटा आणणारे व्हिडिओ व्हायरल होत आहेत, ज्यामध्ये विमानतळावरुन काळ्या धुराचे प्रचंड लोट उठताना दिसत आहेत आणि अग्निशामक दलाच्या गाड्या आग विझवण्यासाठी पाण्याचा मारा करत आहेत.

डोमिनिका रिपब्लिकच्या विमान वाहतूक प्राधिकरणाने या गल्फस्ट्रीम जेट क्रॅशच्या चौकशीचे आदेश दिले. ला रोमाना हे ठिकाण जगप्रसिद्ध पर्यटन स्थळ असून, डोमिनिका रिपब्लिकची जवळपास 1.16 कोटी लोकसंख्या आर्थिकदृष्ट्या पर्यटनावरच अवलंबून आहे. या विमानतळावर यापूर्वी 2021 मध्येही असाच एक भीषण खाजगी विमान अपघात झाला होता, ज्यामध्ये नऊ जणांना आपला जीव गमवावा लागला होता. आता पाच वर्षांनंतर पुन्हा झालेल्या या अपघातामुळे विमान प्रवासाच्या सुरक्षेवर प्रश्नचिन्ह उपस्थित केले जात असून अधिकारी अधिक तपास करत आहेत.