Bomb blast at Shia mosque in Islamabad : पाकिस्तानची राजधानी इस्लामाबाद पुन्हा एकदा भीषण दहशतवादी हल्ल्याने हादरली. शहरातील शहजाद टाउन परिसरातील 'तरलाई इमामबाडा' या शिया धर्मीयांच्या पवित्र प्रार्थनास्थळामध्ये एका आत्मघातकी हल्लेखोराने स्वतःला उडवून दिले.

पाकिस्तानी वृत्तपत्र 'डॉन'ने दिलेल्या माहितीनुसार, या भीषण स्फोटात 31 निष्पाप नागरिकांचा मृत्यू झाला असून अनेक जण गंभीर जखमी झाले आहेत. हा हल्ला दुपारच्या सुमारास झाला, जेव्हा प्रार्थनास्थळाच्या मुख्य प्रवेशद्वारावर कडक सुरक्षा असतानाही हल्लेखोराने स्फोटकांचा वापर करुन स्वतःचा स्फोट घडवून आणला. या घटनेनंतर संपूर्ण इस्लामाबाद शहरात खळबळ उडाली असून भीतीचे वातावरण पसरले आहे.

धमाका इतका शक्तिशाली होता की, त्याचा आवाज दूरपर्यंत ऐकू आला आणि इमामबाड्याच्या परिसरातील इमारतींना हादरे बसले. स्फोटानंतर तात्काळ बचाव पथके आणि सुरक्षा दलांनी घटनास्थळी धाव घेतली. जखमींना जवळच्या रुग्णालयात हलवण्यात आले असून मृतांचा आकडा वाढण्याची भीती व्यक्त केली जात आहे. या घटनेचे गांभीर्य लक्षात घेऊन इस्लामाबादचे पोलीस महानिरीक्षक यांनी संपूर्ण शहरात तात्काळ आणीबाणी घोषित केली. सर्व महत्त्वाच्या वास्तू आणि संवेदनशील ठिकाणांवरील सुरक्षा व्यवस्था कडक करण्यात आली असून शहरात नाकाबंदी करण्यात आली आहे.

इस्लामाबादमध्ये गेल्या काही महिन्यांतील हा दुसरा मोठा आत्मघातकी हल्ला आहे. यापूर्वी 11 नोव्हेंबर 2025 रोजी इस्लामाबादच्या G-11 भागातील जिल्हा आणि सत्र न्यायालयाबाहेर असाच भीषण स्फोट झाला होता, ज्यामध्ये 12 लोकांचा मृत्यू झाला होता. त्या घटनेला तीन महिनेही उलटले नसताना आता पुन्हा एकदा धार्मिक स्थळाला लक्ष्य करण्यात आल्याने पाकिस्तानमधील सुरक्षा व्यवस्थेवर प्रश्नचिन्ह उपस्थित केले जात आहे. वारंवार होणाऱ्या या दहशतवादी हल्ल्यांमुळे सामान्य नागरिकांमध्ये प्रचंड संताप आणि असुरक्षिततेची भावना निर्माण झाली आहे.

पाकिस्तानमधील (Pakistan) शिया समुदाय दीर्घकाळापासून दहशतवादी संघटनांच्या निशाण्यावर आहे आणि या ताज्या हल्ल्याने पुन्हा एकदा धार्मिक विद्वेषाचा क्रूर चेहरा समोर आणला आहे. सध्या पोलीस आणि गुप्तचर यंत्रणा या हल्ल्यामागे कोणत्या दहशतवादी संघटनेचा हात आहे, याचा तपास करत आहेत. मात्र, राजधानीच्या सुरक्षित मानल्या जाणाऱ्या भागात आत्मघातकी हल्लेखोर पोहोचलाच कसा, याबाबत स्थानिक प्रशासनावर टीका होत आहे.