Chaman Border : पाकिस्तान आणि अफगानिस्तानच्या चमन बॉर्डरवर युद्धजन्य परिस्थिती निर्माण झाली आहे. ही युद्धजन्य परिस्थिती टाळण्यासाठी पाकिस्तानमधील चार मौलवींचे प्रतिनिधीमंडळ अफगानिस्तानमध्ये जाणार आहे. मौलवींचे हे प्रतिनिधीमंडळ तालिबानकडून चमन बॉर्डरवर होणाऱ्या हल्ल्यांना कसे रोखले जाईल यावर चर्चा करणार आहे .

चमन जिल्हा प्रशासनाच्या म्हणण्यानुसार, मौलवींचे हे प्रतिनिधीमंडळ अफगानिस्तानच्या रक्षा मंत्रालयात अफगानिस्तानचे अधिकारी आणि तालिबानचे अधिकारी यांच्याबरोबर चर्चा करुन प्रश्न सोडवण्याचा प्रयत्न करणार आहे. समोर आलेल्या मााहितीनुसार, चमन बॉर्डरवर सतत होणाऱ्या हल्लांमुळे दोन्ही देशात अस्थिरता निर्माण झाली आहे. त्याचबरोबर, पाकिस्तान आणि अफगानिस्तान या दोन देशांमध्ये सीमाप्रश्नावरुन सातत्याने वाद आहेत.

पाकिस्तान ( Pakistan ) आणि अफगानिस्तान ( Afganistan ) यांच्यामध्ये 2600 किलोमीटरची सीमारेषा आहे. ही सीमारेषा बलुचिस्तानला अफगानिस्तानमधल्या कंधारला जोडते. एका हत्यारधारकाने ही सीमारेषा पार करत पाकिस्तानमध्ये प्रवेश करत सुरक्षारक्षकांवर गोळीबार केला होता , त्यानंतर ही बॉर्डर बंद करण्यात आली आहे. आता मौलवींचे प्रतिनिधीमंडळ आणि अफगानिस्तानमधील होणाऱ्या चर्चेनंतर चमन बॉर्डरचा प्रश्न सुटणार का हे पाहणे महत्वाचे ठरणार आहे.