Nepal Politics: नेपाळचे पंतप्रधान आणि नेपाळी काँग्रेसचे अध्यक्ष शेर बहादूर देउबा यांनी बुधवारी संसदीय पक्षाच्या नेतेपदाच्या निवडणुकीत विजय मिळवला. देउबा यांनी त्यांचे निकटचे प्रतिस्पर्धी आणि पक्षाचे सरचिटणीस गगनकुमार थापा यांचा 39 मतांनी पराभव केला, असे अधिकाऱ्यांनी सांगितले.

अधिकाऱ्यांनी दिलेल्या माहितीनुसार, नेपाळी काँग्रेसच्या सर्व 89 खासदारांनी मतदानात भाग घेतला. यामध्ये 76 वर्षीय देउबा यांना 64 मते मिळाली, तर 45 वर्षीय थापा यांना केवळ 25 मते मिळाली. संसदीय पक्षाच्या नेत्याच्या निवडणुकीत विजयाचा अर्थ असा आहे की, 20 नोव्हेंबरच्या सार्वत्रिक निवडणुकीत नेपाळी काँग्रेस (Congress) सर्वात मोठा पक्ष म्हणून उदयास आल्यानंतर देउबा पुढील सरकारचे नेतृत्व करतील.

काँग्रेसने प्रतिनिधीगृहात एकूण 89 जागा मिळवल्या.

नुकत्याच पार पडलेल्या सार्वत्रिक निवडणुकीत (Election) नेपाळी काँग्रेसने प्रतिनिधीगृहात एकूण 89 जागा मिळवल्या आहेत. यापैकी 57 जागा पक्षाने थेट मतदानाद्वारे तर 32 जागा समानुपातिक प्रतिनिधित्व निवडणूक पद्धतीद्वारे जिंकल्या आहेत.

दरम्यान, संसदीय सचिवालयातील सूत्रांनी सांगितले की, प्रतिनिधीगृहाच्या नवनिर्वाचित सदस्यांचा शपथविधी सोहळा 22 डिसेंबर रोजी होणार आहे. 275 सदस्यीय प्रतिनिधीगृहात 165 सदस्य प्रत्यक्ष मतदानाद्वारे निवडले गेले, तर उर्वरित 110 सदस्य समानुपातिक निवडणूक (Election) पद्धतीद्वारे निवडले गेले.

तसेच, हिमालयीन देशातील दीर्घकाळ चाललेली राजकीय अस्थिरता संपवण्यासाठी प्रतिनिधीगृह आणि सात प्रांतीय विधानसभांच्या निवडणुका नुकत्याच पार पडल्या.