Dawood Ibrahim Hospitalised in Karachi: मोस्ट वॉण्टेड अंडरवर्ल्ड डॉन दाऊद इब्राहिमला पाकिस्तानमध्ये रुग्णालयात दाखल करण्यात आले आहे. दाऊदवर कराचीमध्ये विषप्रयोग केल्याचा दावा केला जात आहे. मात्र, याबाबत अद्याप कोणतीही अधिकृत माहिती समोर आलेली नाही.

अंडरवर्ल्ड डॉन दाऊद इब्राहिमला कराचीतील रुग्णालयात दाखल करण्यात आल्याचा दावा सोशल मीडियावर केला जात आहे. कोणीतरी अज्ञात व्यक्तीने त्याच्यावर विषप्रयोग केल्याचा दावा केला जात आहे. यामुळे दाऊदला रुग्णालयात दाखल करण्यात आले आहे.

दरम्यान, दाऊद एका गंभीर आजारामुळे कराचीतील रुग्णालयात दाखल आहे, अशी पुष्टी दाऊदच्या टोळीतील एका माजी सदस्याने दिली आहे. दाऊदला दोन दिवसांपूर्वी रुग्णालयात दाखल करण्यात आले होते.

रुग्णालयात कडेकोट बंदोबस्तात ठेवण्यात आला आहे आणि त्याला ज्या मजल्यावर त्याच्यावर उपचार सुरु आहेत तेथे कोणालाही जाण्याची परवानगी नाही. केवळ उच्चपदस्थ अधिकारी आणि कुटुंबातील जवळचे लोकच तेथे जाऊ शकतात.

दाऊदवरती विषप्रयोग केल्याबाबत अद्याप अधिकृत माहिती समोर आलेली नाह. मात्र, मुंबई पोलीस अधिकारी दाऊदच्या जवळच्या नातेवाईकांकडून (पुतण्या अलिशा पारकर आणि साजिद वागळे) याबाबत अधिक माहिती घेण्याचा प्रयत्न करत असल्याचे सांगण्यात येत आहे.

पाकिस्तानी प्रसारमाध्यमांनी प्रसिद्ध केलेल्या वृत्तानुसार, दाऊदला रुग्णालयात दाखल करण्याचे कारण अद्याप स्पष्ट नाही. पाकिस्तानी आणि भारतीय अधिकाऱ्यांनी याबाबतच्या वृत्ताला अधिकृत दुजोरा दिलेला नाही. दाऊदची तब्येत अचानक बिघडण्याचे एक कारण विष असण्याची शक्यता वर्तवली जात आहे. याआधीही दाऊदला अनेक गंभीर आजार झाल्याचा दावा करण्यात आला होता. अलिकडेच गँगरीनमुळे कराचीतील रुग्णालयात त्याच्या दोन बोटांवर शस्त्रक्रिया करण्यात आली होती.