Cobra Meat Street Food Indonesia: तुम्ही आजवर चिकन, मटन आणि मासे खाणारे अनेक खवय्ये पाहिले असतील, पण कोणी चक्क विषारी कोब्रापासून बनवलेले पदार्थ आवडीने खाताना पाहिले आहे का? सध्या सोशल मीडियावर असाच एक अंगावर काटा आणणारा आणि थक्क करणारा व्हिडिओ वेगाने व्हायरल होत आहे, ज्यामध्ये लोक चिकन-मटन बाजूला ठेवून कोब्रा सापाचे भजी आणि समोसे अगदी ताव मारुन खाताना दिसत आहेत. या अनोख्या व्हिडिओची सध्या इंटरनेटवर जोरदार चर्चा सुरु आहे.

व्हायरल होत असलेला हा व्हिडिओ इंडोनेशियाची (Indonesia) राजधानी जकार्ता येथील एका प्रसिद्ध आणि वेगळ्या स्ट्रीट फूड मार्केटमधील आहे. आपल्याकडे ज्याप्रमाणे प्रत्येक चौकात आणि गल्लीबोळात चाट-समोसे किंवा चिकन-मटनचे स्टॉल्स पाहायला मिळतात, अगदी त्याचप्रमाणे जकार्ताच्या रस्त्यांवर कोब्राच्या मांसापासून बनवलेले विविध पदार्थ विकणारी दुकाने सजलेली असतात. इन्स्टाग्रामवर एका ट्रॅव्हल ब्लॉगरने हा व्हिडिओ शेअर केला असून, तो पाहून नेटीझन्सच्या पायाखालची जमीन सरकली आहे.

या व्हिडिओमध्ये स्पष्टपणे दिसते की, सापाचे पदार्थ खाण्यासाठी दुकानांवर ग्राहकांची प्रचंड गर्दी होते. या दुकानांमध्ये शेकडो जिवंत कोब्रा साप पिंजऱ्यात ठेवलेले आहेत. सुरक्षेचा उपाय म्हणून या अत्यंत धोकादायक आणि विषारी सापांच्या तोंडावर पट्टी लावलेली आहे, जेणेकरुन ते कोणाला चावणार नाहीत. ग्राहक जशी ऑर्डर देतात, तशा दुकानातील महिला कर्मचारी अत्यंत वेगाने आणि सराईतपणे कोब्रा सापाचे मांस शिजवतात.

दुकानदारांच्या मते, स्थानिक लोकांमध्ये कोब्राच्या मांसाला प्रचंड मागणी आहे. येथे केवळ सापाचे भजीच मिळतात असे नाही, तर कोब्रा सूप, टिक्का, सॉसेज आणि समोसे यांसारखे अनेक चमचमीत पदार्थ ग्राहकांसाठी तयार केले जातात. सापांशी संबंधित हा थरारक व्हिडिओ पाहून जगभरातील नेटीझन्सनी आश्चर्य आणि भीती व्यक्त केली, परंतु जकार्तामधील लोकांसाठी हा त्यांच्या रोजच्या आहाराचा आणि जीवनशैलीचा एक सामान्य भाग बनला आहे.