Israel Iran Tensions: एकीकडे इस्त्रायल आणि हमास यांच्यातील युद्ध थांबण्याचं नाव घेत नाहीये तर दुसरीकडे इस्त्रायल आणि इराण यांच्यातील तणाव शिगेला पोहोचला आहे. इराणसोबत सुरु असलेल्या तणावाच्या पार्श्वभूमीवर इस्रायलने आपला ‘मित्र’ भारताकडे मदतीचे आवाहन केले आहे. नवी दिल्लीतील इस्रायलचे राजदूत नाओर गिलन म्हणाले की, पश्चिम आशियातील शांततेसाठी भारताने इराणला रोखावे अशी आमची अपेक्षा आहे. इस्रायलवरील ड्रोन आणि क्षेपणास्त्र हल्ल्यांनंतर नवी दिल्लीने मित्र म्हणून पाऊल उचलावे आणि तेहरानला पश्चिम आशियाला अस्थिर करण्यापासून रोखावे अशी मागणी इस्रायली राजदूताने केली. इस्रायली दूतावासात पीटीआय या वृत्तसंस्थेला दिलेल्या मुलाखतीत गिलन म्हणाले की, इस्रायल मजबूत आहे आणि गरज पडल्यास अलीकडच्या हल्ल्यानंतर तो इराणचा सामना करेल.

इस्रायलचे राजदूत म्हणाले की, पश्चिम आशियामध्ये स्थिरता आणण्यासाठी भारताने भूमिका बजावली पाहिजे. पश्चिम आशिया हा भारतासाठी अत्यंत महत्त्वाचा प्रदेश आहे कारण लाखो भारतीय येथे काम करतात. संयुक्त अरब अमिराती, सौदी अरेबिया आणि कतार यांच्याशी मजबूत व्यापारी संबंध आहेत. मला वाटते की इराणला रोखण्यासाठी आंतरराष्ट्रीय समुदायाचा एक भाग म्हणून भारत सक्रिय होईल. त्यांनी पुढे सांगितले की, गोष्टी सामान्य करण्यासाठी भारताने हस्तक्षेप करावा.

इस्रायलला भारताकडून आशा आहेत

भारतीय परराष्ट्रमंत्र्यांची इस्रायल आणि इराणमधील आपल्या समकक्षांशी चर्चा पाहता भारताकडून काय भूमिका अपेक्षित आहे, असा प्रश्न इस्रायलच्या राजदूताला विचारण्यात आला. यावर ते म्हणाले की, "मला वाटते की एक मित्र या नात्याने आम्ही अपेक्षा करतो की भारत इराणने पश्चिम आशियात निर्माण केलेल्या युद्धजन्य परिस्थितीवर रोख लावण्यासाठी मदत करेल."

गिलन म्हणाले की, इराणने इस्रायलवर 350 क्षेपणास्त्रे आणि ड्रोनने हल्ला केला. 99 टक्के क्षेपणास्त्रे आणि ड्रोन रोखल्याबद्दल त्यांनी अमेरिका आणि प्रदेशातील इतर मित्रांसह इस्रायलच्या हवाई संरक्षण आणि हवाई दलाच्या प्रचंड क्षमतेचे आभार मानले. सुदैवाने कोणतीही जीवितहानी झाली नसल्याचे त्यांनी सांगितले. इस्रायलच्या दक्षिणेतील फक्त एक 7 वर्षांची मुलगी जखमी झाली. ती लवकरच बरी होण्याची अपेक्षा असल्याचे ते म्हणाले.