Israel-Hamas War: इस्रायल आणि पॅलेस्टाईनची दहशतवादी संघटना हमास यांच्यात गेल्या तीन महिन्यांपासून युद्ध सुरु आहे. हमासने गाझाला आपला तळ बनवला आहे, जिथे मोठी लोकसंख्या राहते. इस्रायली लष्करही गाझामध्ये घुसले असून हमासच्या दहशतवाद्यांचा शोध घेऊन त्यांना ठार मारत आहे. यातच आता, नवीन वर्षाच्या दिवशी इस्रायलने गाझामधून आपल्या 5 ब्रिगेड्स मागे घेण्याचा आणि हमासचा नायनाट करण्याचा मास्टर प्लॅन बनवला आहे.

दरम्यान, इस्रायली लष्कराने (IDF) युद्धाच्या मध्यातच आपल्या 5 लढाऊ ब्रिगेड्स मागे घेण्याचा निर्णय घेतला आहे. या पाच ब्रिगेड हमासशी दोन होत करत आहेत. दुसरीकडे, इस्रायलचा सैनिकांना माघे घेण्याचा उद्देश त्यांना काही दिवस विश्रांती देण्याचा आहे. मीडिया रिपोर्ट्सनुसार, आयडीएफचे प्रवक्ते डॅनियल हगारी यांनी सांगितले की, नवीन वर्षात, काही सैनिक त्यांच्या कुटुंबाकडे परत येतील, जेणेकरुन ते पुढे लढा सुरु ठेवण्यासाठी स्वत: ला मजबूत करु शकतील. काही दिवस विश्रांती घेतल्यानंतर हे सैनिक पुन्हा लढण्यासाठी गाझामध्ये जातील.

गाझामध्ये गेल्या 24 तासांत 150 लोकांचा मृत्यू झाला

इस्रायल आणि हमास यांच्यातील युद्धात आतापर्यंत हजारो लोकांना आपले प्राण गमवावे लागले आहेत. या युद्धात दोन्ही देशातील लोक मारले जात आहेत. आता इस्रायली सैन्य गाझामध्ये घुसून नरसंहार करत आहे, तर हमासचे दहशतवादी लोकांमध्ये लपून आपला जीव वाचवत आहेत. गाझाच्या आरोग्य मंत्रालयाने एक आकडेवारी जाहीर केली की, गेल्या 24 तासांत 150 पॅलेस्टिनींचा मृत्यू झाला आहे, तर 286 लोक गंभीर जखमी आहेत आणि त्यांच्यावर रुग्णालयात उपचार सुरु आहेत.

हमासविरुद्ध युद्ध सुरुच राहील: नेतन्याहू

इस्रायलचे पंतप्रधान बेंजामिन नेतन्याहू यांनी हमासविरुद्ध युद्ध सुरु ठेवण्याची घोषणा केली आहे. जोपर्यंत हमासने ओलीस ठेवलेल्या आमच्या लोकांची सुटका होत नाही तोपर्यंत युद्ध असेच सुरु राहील, असे ते म्हणाले. इस्रायली लष्कर गाझामध्ये घुसून हमास आणि त्याच्या दहशतवाद्यांचे बोगदे उद्ध्वस्त करत आहे, तर हमासही इस्रायलवर हल्ले करत आहे, मात्र या युद्धात नागरिकांनाही आपला जीव गमवावा लागत आहे.