Imran Khan: पाकिस्तानचे माजी पंतप्रधान इमरान खान यांच्या अडचणीत दिवसेंदिवस वाढ होताना दिसत आहे. काही दिवसांपूर्वीच तोषखाना प्रकरणात त्यांना अटक करण्यात आली आहे.

आता अमेरिकेच्या दूतावासाकडून त्यांना आणखी एक झटका मिळाला आहे. अमेरिकेच्या दूतावासातून गुप्त राजकीय दस्ताऐवज सार्वजनिक केलेल्या आरोपावरुन त्यांच्यावर आणखी एक गुन्हा नोंदवला गेला आहे. या महिन्याच्या सुरुवातीला इमरान खान यांना भ्रष्टाचार प्रकरणात न्यायालयाने तीन वर्षाची तुरुंगवासाची शिक्षा सुनावली आहे.

मिळालेल्या माहीतीनुसार, पाकिस्तान तहरीक-ए-इंसाफ (PTI) चे प्रमुख इमरान खान यांच्यावर सरकारी गुप्तता अधिनियम 1923, कलम 5 नुसार केस दाखल केली गेली आहे. कलम ५ नुसार जर इमरान खान यांचा गुन्हा सिद्ध झाला तर त्यांना 14 वर्षे कारावासाची शिक्षा होऊ शकते तर काही प्रकरणांमध्ये त्यांना मृत्यूची शिक्षादेखील सुनावली जाण्याची शक्यता आहे.

याआधी इमरान खान ( Imran Khan ) यांनी अमेरिकेवर गुप्त राजनैतिक दस्ताऐवजांचा वापर करुन आपले सरकार पाडल्याचा आरोप लावल्याचे संपूर्ण जगाने पाहिले आहे. मात्र अमेरिकेने हे आरोप फेटाळून लावल्याचे दिसून आले आहे.

दरम्यान, पाकिस्तानमध्ये गेल्या काही महिन्यांपासून पाकिस्तानचे माजी पंतप्रधान इमरान खान यांच्या अटकेवरुन राजकीय नाट्य रंगल्याचे दिसून आले होते. इमरान खान यांच्या समर्थकांमनी त्यांच्या अटकेला जोरदार विरोध केला होता.

महत्वाचे म्हणजे, इमरान खान यांनी शहबाज शरीफ यांच्या सरकारवर आपल्याविरुद्ध कट केल्याचा आरोप केला होता. आता इमरान खान यांच्यावरील हे आरोप सिद्ध होणार का आणि आरोप सिद्ध झाले तर काय शिक्षा मिळणार हे पाहणेदेखील महत्वाचे ठरणार आहे.