Flood In Kenya: मध्य केनियातील माई माहिउ भागात पुरामुळे प्रचंड नुकसान झाले आहे. केनियाच्या मीडियानुसार, सोमवारी दुपारपर्यंत या भीषण दुर्घटनेतील मृतांची संख्या 42 वर पोहोचली आहे. येथील जनजीवन प्रभावित झाले आहे.

दरम्यान, पुरामुळे माई माहिउ भागात जनजीवन विस्कळीत झाले आहे. येथील रस्ते पाण्याखाली गेले आहेत. सरकारने बोटीच्या सहाय्याने लोकांना त्यांच्या घरातून सुरक्षित बाहेर काढले आहे. पुरामुळे लाखो लोक बेघर झाले आहेत. केनिया सरकारने पूरग्रस्त भागांजवळ मदत शिबिरे उभारली आहेत. या शिबिरांमध्ये लोकांसाठी भोजन आणि निवासाची व्यवस्था करण्यात आली आहे.

मुसळधार पावसाचा इशारा

केनियाच्या हवामान खात्याने येत्या काही दिवसांत वेगवेगळ्या ठिकाणी मुसळधार पावसाची शक्यता वर्तवली आहे. केनियातील अनेक राज्यांना पुराचा मोठा फटका बसला आहे. मुसळधार पाऊस आणि पुरामुळे येथे विध्वंस झाला आहे. पूर्व आफ्रिकेतील माकुएनी परगण्यातील नदी दुथडी भरुन वाहत आहे. यापूर्वी, मार्च 2024 मध्ये केनियामध्ये पुरामुळे 70 लोकांचा मृत्यू झाला होता.

200 हून अधिक लोकांना सुरक्षितरित्या बाहेर काढण्यात आले

केनिया रेड क्रॉस सोसायटीच्या म्हणण्यानुसार, देशभरातील पूरग्रस्त भागातून 200 हून अधिक लोकांना बाहेर काढण्यात आले आहे. याशिवाय, आतापर्यंत 11 हजारांहून अधिक लोक बेघर झाले आहेत. मार्चमध्ये केनियाच्या विविध भागात पावसाला सुरुवात झाली. गेल्या काही दिवसांपासून येथे पावसाचा जोर वाढला असून 100 मिमीपेक्षा जास्त पावसाची नोंद झाली आहे.