Elon Musk Launch Perfume: टेस्ला, स्पेसएक्स या कंपन्यांचे सीईओ आणि जगातील सर्वात श्रीमंत व्यक्ती एलन मस्क यांनी आता त्यांच्या नव्या व्यवसायाची घोषणा केली आहे. मस्क आता चक्क परफ्युम विकणार आहेत. मस्क यांनी एक नवा परफ्युम लाँच केला आहे. सोशल मीडियातून त्यांनी ही माहिती दिली आहे.

मस्क यांनी स्वतःचेच व्हेंचर असलेल्या द बोरिंग कंपनीच्या माध्यमातून 'बर्न्ट हेयर' नावाचा हा नवा परफ्युम लाँच केला. विशेष म्हणजे, मस्क यांच्या सोशल मीडिया पोस्टनंतर या परफ्युमच्या १० हजार बॉटल्सची विक्री झाली आहे.

मस्क यांनी हे प्रोडक्ट लाँच करताना आपल्या ट्विटर अकाऊंटवरील बायोमध्ये बदल केला आहे. त्यांनी बायोमध्ये 'परफ्यूम सेल्समन' असे लिहिले आहे. मस्क यांनी पोस्टमध्ये या परफ्युमच्या बाटलीचा फोटोही शेअर केला आहे. तसेच 'द फायनेस्ट फ्रॅग्रन्स ऑन अर्थ' अशी कॅप्शनही दिली आहे.

या पोस्टमध्ये मस्क यांनी कंपनीच्या वेबसाईटची लिंकही शेअर केली आहे. या वेबसाईटवर हा परफ्युम खरेदी करता येईल. या परफ्युमची किंमत 100 डॉलर इतकी आहे. म्हणजे भारतीय ग्राहकांसाठी या परफ्युमची किंमत 8400 रूपये इतकी ठेवली गेली आहे. त्यात आंतरराष्ट्रीय शिपिंज चार्जेसचे 3000 रुपए स्वतंत्र लावले जातील. म्हणजेच या परफ्युमच्या एका बॉटलची किंमत भारतीय ग्राहकांना 11,400 रुपयांना मिळेल.

या पोस्टनंतर मस्क यांनी आणखी एक पोस्ट शेअर करत 10 हजारहून अधिक बॉटल्सची विक्री झाल्याची माहिती दिली आहे. अर्थात या बॉटल्सचे वितरण 2023 च्या पहिल्या तिमाहीमध्ये होणार आहे. DOGE या क्रिप्टोकरन्सीद्वारेही या परफ्युमची खरेदी करता येईल.

एलन मस्क हे सतत चर्चेत असतात. कधी ट्विट करून, कधी एखादी घोषणा करून. सप्टेंबरमध्ये जेव्हा मस्क यांनी परफ्युम इंडस्ट्रीत उतरणार असल्याचे सांगितले होते तेव्हा अनेकांना ती मस्करी वाटली होती.