Egypt Trains Accident News: इजिप्तची राजधानी कैरोच्या दक्षिणेकडील गिझा प्रांतातील अल-अय्यात जिल्ह्यात रविवारी (10 नोव्हेंबर) दोन प्रवासी रेल्वे गाड्यांमध्ये भीषण टक्कर झाल्याची दुर्घटना घडली. या अपघातात चार जणांचा मृत्यू झाला असून, 88 हून अधिक प्रवासी गंभीर जखमी झाले. इजिप्तच्या परिवहन मंत्रालयाने दिलेल्या माहितीनुसार, फय्यूम प्रांताच्या दिशेने जाणाऱ्या एका रेल्वेने असवान प्रांताकडे जाणाऱ्या दुसऱ्या रेल्वेला मागून जोरदार धडक दिली.

या भीषण धडकेमुळे एक रेल्वेगाडी रुळावरुन खाली घसरली, मात्र नेमकी कोणती गाडी घसरली हे अद्याप स्पष्ट करण्यात आलेले नाही. घटनेची माहिती मिळताच तातडीने मदत आणि बचाव पथके घटनास्थळी दाखल झाली असून, सर्व जखमींना उपचारासाठी परिसरातील रुग्णालयांत दाखल करण्यात आले.

या दुर्देवी दुर्घटनांमुळे इजिप्तमध्ये खळबळ उडाली असून, देशाचे राष्ट्राध्यक्ष अब्देल फतह अल-सीसी यांनी या अपघातावर शोक व्यक्त केला. त्यांनी सोशल मीडियाच्या माध्यमातून या संपूर्ण प्रकरणाच्या उच्चस्तरीय चौकशीचे आदेश दिले असून, या भीषण अपघातास दोषी असणाऱ्या प्रत्येक व्यक्तीची जबाबदारी निश्चित करुन कठोर कारवाई केली जाईल, असे स्पष्ट केले. रेल्वे प्रशासनाने घटनास्थळावरील मलबा हटवण्यासाठी आणि रेल्वे सेवा लवकरात लवकर पूर्ववत करण्यासाठी क्रेन व इतर यंत्रसामग्री तैनात केली. विशेष म्हणजे, याच अल-अय्यात जिल्ह्यात गेल्या वर्षी सप्टेंबर महिन्यातही दोन मालगाड्यांमध्ये टक्कर झाल्याची दुर्घटना घडली होती, ज्यामध्ये चालक आणि त्याचा सहायक जखमी झाले होते.

दुसऱ्या एका घटनेत, आफ्रिका खंडातच केन्यामधील माकुएनी येथे बस आणि ट्रक यांच्यात झालेल्या आणखी एका भीषण रस्ते अपघातात 22 जणांचा मृत्यू तर अनेकजण जखमी झाले. बसमधील सर्व प्रवासी एका अंत्यविधीवरुन परतत असताना हा काळजाचा ठोका चुकवणारा अपघात (Accident) घडला. अवघ्या तीन आठवड्यांपूर्वीच याच महामार्गावर झालेल्या अन्य एका अपघातात 17 जणांचा मृत्यू झाला होता, ज्यामुळे वाढत्या रस्ते आणि रेल्वे अपघातांच्या सुरक्षिततेचा प्रश्न पुन्हा एकदा ऐरणीवर आला.