America Crime: अमेरिकेत गोळीबाराच्या घटना थांबायचं नाव घेत नाहीयेत. एकामागून एक अशा घटना समोर येत आहेत. कधी लोकांच्या घरात घुसून, कधी बार आणि रेस्टॉरंटमध्ये गोळीबार करुन तर कधी गजबजलेल्या ठिकाणी गोळीबार करुन हल्लेखोरांनी अमेरिकन पोलिसांसमोर मोठे आव्हान उभे केले आहे. असे असूनही अमेरिकन पोलिस हातावर हात ठेवून शांत बसलेले दिसत आहेत. गुन्हेगारी घटनांची संख्या झपाट्याने वाढूनही अमेरिकन पोलिस गुन्हेगारांवर कारवाई करण्यात निष्पळ ठरत आहेत. ताज्या प्रकरणात, अमेरिकेतील मिनियापोलिसमधील एका अपार्टमेंट कॉम्प्लेक्समध्ये मोठा गोळीबार झाला. या गोळीबारात संशयित बंदूकधाऱ्यासह तिघांचा मृत्यू झाला.

दरम्यान, अमेरिका (America) पोलिसांनी ही माहिती दिली. ही घटना दक्षिण मिनियापोलिसमध्ये घडल्याचे सांगण्यात येत आहे. या गोळीबारात दोन पोलीस अधिकारीही जखमी झाले आहेत. याप्रकरणी अद्याप सविस्तर माहिती मिळालेली नाही. पोलिसांनी जारी केलेल्या निवेदनात म्हटले आहे की, गोळीबारात दोन अधिकाऱ्यांव्यतिरिक्त चार नागरिकही जखमी झाले आहेत. मिनियापोलिस पोलिसांनी स्थानिक रहिवाशांना घटनास्थळाजवळ न जाण्याचा सल्ला दिला आहे. गोळीबाराची सविस्तर माहिती पोलिस पत्रकार परिषदेत देणार आहेत.

हल्लेखोराबाबत काहीही माहिती नाही

पोलिसांनी (Police) दिलेल्या माहितीनुसार, संशयित हल्लेखोरही मारला गेला आहे, मात्र त्याने गोळीबार का केला हे अद्याप समजू शकलेले नाही. बंदूकधारी व्यक्तीचे लक्ष्य कोण आणि का होते? पोलिस या संपूर्ण प्रकरणाचा सखोल तपास करण्यात व्यस्त आहेत. फॉरेन्सिक तपासणीसाठी घटनास्थळावरुन नमुने गोळा करण्यात येत आहेत.