Australian Parliament: संसद ही देशाची प्रतिष्ठा असते. येथे देशहिताचे निर्णय घेतले जातात. जनता आपले प्रतिनिधी निवडून इथे पाठवते. ते लोकशाहीचे मंदिर आहे. मात्र, ऑस्ट्रेलियाच्या संसदेतून लाजिरवाणी घटना समोर आली आहे.

महिला खासदाराचे अश्रू अनेक प्रश्न उपस्थित करत आहेत. संसदेत रडत रडत लिडिया थॉर्प यांनी लैंगिक छळाचा आरोप केला.

जेव्हा-जेव्हा त्यांना या गुन्ह्याच्या विरोधात आवाज उठवायचा होता, तेव्हा त्यांना धमक्या देऊन गप्प केले जात होते. संसदेत महिला (Women) खासदार रडत असल्याचे चित्र आज जगभरात चर्चेचा विषय बनले आहे.

दरम्यान, ऑस्ट्रेलियाच्या खासदार लिडिया थॉर्प यांनी संसदेत लैंगिक छळ झाल्याचा आरोप केला आहे. महिलांना काम करण्यासाठी ही संसद (Parliament) सुरक्षित नसल्याचे त्यांनी सांगितले. हे सांगताना त्या रडल्या.

आपल्या भाषणात लिडिया म्हणाल्या की, 'माझ्यावर घाणेरड्या कमेंट करण्यात आल्या. मला एका जिन्याजवळील कोपऱ्यात बसवून अयोग्य स्पर्श करण्यात आले.' थॉर्प यांनी कंझर्व्हेटिव्ह डेव्हिड वान यांच्यावर हे आरोप केले आहेत.

जरी वान यांनी हे आरोप पूर्णपणे फेटाळले आहेत. हे आरोप पूर्णपणे खोटे असल्याचे त्यांनी स्थानिक माध्यमांना सांगितले. मात्र, लिबरल पक्षाने वान यांना पक्षातून निलंबित केले.

माझ्यासारखे इतरही बळी आहेत

थॉर्प पुढे म्हणाल्या की, 'लैंगिक छळाचा अर्थ प्रत्येकासाठी वेगळा असतो.' आपल्या बाबतीत काय झाले ते मी सांगितले, असेही त्या म्हणाल्या.

थार्प पुढे म्हणाल्या की, 'माझ्याबाबतीत जबरदस्ती करण्यात आली. ऑफिसच्या गेटमधून बाहेर पडायला मला भीती वाटत होती. मला माहित आहे की, माझ्यासारख्या इतरही महिला खासदार पीडित आहेत, पण त्या त्यांच्या करिअरमुळे कधीच पुढे आल्या नाहीत.'