Pakistan Economic Crisis: पाकिस्तानची अर्थव्यवस्था अत्यंत वाईट टप्प्यातून जात आहे. येथे खाद्यपदार्थांपासून ते इतर सर्व वस्तूही अनेकपटींनी महागल्या आहेत. महागाईने लोकांचे कंबरडे मोडले आहे. सरकारच्या विरोधात लोकांमध्ये प्रचंड रोष आहे. यामुळे सोशल मीडियावर लोक सरकारला फटकारत आहेत. पाकिस्तानचे अर्थमंत्री इशाक दार आणि माजी अर्थमंत्री मिफ्ताह इस्माईल यांच्यावर लोक टीका करत आहेत.

पाकिस्तानमध्ये महागाईमुळे लोकांची अवस्था वाईट आहे. दैनंदिन वापराच्या वस्तू इतक्या महाग झाल्या आहेत की सर्वसामान्य कुटुंबाला ते विकत घेणे कठीण झाले आहे. येथे वाहनांचे दरही गगनाला भिडले आहेत.

प्रसारमाध्यमांतील माहितीनुसार पाकिस्तानमध्ये अल्टो कारची किंमत 25 लाख रुपयांवर गेली आहे. पाकिस्तानी पत्रकार वजाहत खान यांनी ट्विटरवर गेल्या दशकात पाकिस्तानचे अर्थमंत्री राहिलेल्या नेत्यांची नावे लिहून पाकिस्तानच्या अर्थमंत्र्यांवर निशाणा साधला.

वजाहत खान यांनी ट्विटरवर नवीन कारच्या किमतींच्या बातमीची लिंक शेअर केली आहे. त्यावरून त्यांनी गेल्या दशकात पाकिस्तानचे अर्थमंत्री राहिलेल्या इशाक दार, मिफ्ताह इस्माईल, असद उमर, हाफिजा पाशा, शौकत तरीन, रझा बाकीर, बब्बर जैदी या सर्वांचे कुत्सितपणे आभार मानले आहेत.

विद्यमान आणि माजी मंत्र्यांची नावे लिहून वजाहत यांनी म्हटले आहे की, जसे तुम्ही आम्हाला बिघडवले तसा तुमचा सीट बेल्ट कधीही बिघडू नये.

पाक सुझुकी मोटर कंपनीने मंगळवारी विविध मॉडेल्सची किंमत 115,000 रुपयांवरून 355,000 रुपयांपर्यंत वाढवली आहे. यापूर्वी होंडा अॅटलस कार लिमिटेड आणि इंडस मोटर कंपनीनेही त्यांच्या वाहनांच्या किमती वाढवल्या होत्या.

आता पाकिस्तानात परिस्थिती अशी आहे की इथे अल्टो कारची किंमत 25 लाख आहे तर वॅगनआरची किंमत 30 लाखांच्या पुढे गेली आहे. WagonR VXR ची किंमत 26.29 लाख रुपये झाली आहे तर AGS मॉडेलची किंमत 30.59 लाख रुपये झाली आहे.